Սերգեյ Շևչուկը, Մաքսիմ Ժեստոկովը և Արտակ Եդիգարյանը հեռացան «Փյունիկից»: Ֆուտբոլիստների հետ պայմանագրերի ժամկետներն ավարտվել են, այս մասին տեղեկացնում են ակումբի մամուլի ծառայությունից։
Նշվում է, որ կիսապաշտպան Սերգեյ Շևչուկը «Փյունիկում» էր 2019թ. մարտից: Ուկրաինացի ֆուտբոլիստն անցկացրած 37 խաղում դարձել է 2 գոլի և 15 գոլային փոխանցման հեղինակ:
Նրա խաղընկեր, կիսապաշտպան Արտակ Եդիգարյանը «Փյունիկ» էր վերադարձել 2019թ. հուլիսին: Վերադարձից հետո անցկացրած 21 խաղում դարձել է 5 գոլի և 2 գոլային փոխանցման հեղինակ:
Իսկ պաշտպան Մաքսիմ Ժեստոկովը «Փյունիկում» էր 2018թ. հուլիսից: «Փյունիկի» կազմում անցկացրած 55 խաղում դարձել է 6 գոլի և 2 գոլային փոխանցման հեղինակ:
«Փյունիկ» ՖԱ-ն շնորհակալություն է հայտնել ֆուտբոլիստներին՝ ցուցաբերած բարձր պրոֆեսիոնալիզմի համար, և մաղթել հաջողություն հետագա կարիերայում: