Այսօր Կառավարության նիստի ընթացքում ՀՀ Արտաքին գործերի նախարար Ֆելիքս Ցոլակյանը նշեց, որ անձրևները շարունակվելու են:
«Ամսի 20-ին շատ ինտենսիվ է լինելու անձրևը, իսկ լեռնային շրջաններում ձյան տեսքով տեղումներ են լինելու: Ջերմաստիճանը մինիմալը իջնելու է գիշերը 3 աստիճան: Ջրերի հետ կապված, մենք առաջին ահազանգն ենք ստացել Երվանդաշատ գյուղից, որ այնտեղ ջրերը բարձրանում են գետի ու կարող են դաշտերը ծածկել», – ասաց նա:
Ֆելիքս Ցոլակյանի խոսքով՝ Տարածքային կառավարման ու զարգացման նախարարի հետ խոսել է՝ այնտեղ աշխատանքներ է անհրաժեշտ կատարել:
«Ակտիվացել են սողանքները. վեց կետով ակտիվ սողանքներ ունենք այսօր, Լոռվա մարզում շատ ակտիվ սողանք ունենք, որը սպառնում է անտառային շերտի հոսք դեպի ճանապարհ, մի գյուղի ճանապարհ կարող է փակվել», – հավելեց նախարարը:
Ֆելիքս Ցոլակյանը նշեց, որ մոտ 600 հազար տոննա հողի մասին է խոսքը, որ կարող է լցվել ճանապարհին:
«Դրա մաքրելը շատ բարդ կլինի, մենք սրա մասին պետք է մտածենք», – ասաց նա՝ նշելով, որ այլընտրանքային ճանապարհ կա, որի վիճակը վատ է:
«Քարաթափումներն էլ են ակտիվացել, խնդիր կա», – ասաց ԱԻ նախարարը:
Վարչապետ Նիկոլ Փաշինյանն արձագանքեց, որ կա երկու խնդիր՝ մեկն օպերատիվ խնդիրն է, մյուսն էլ ՝ մեխանիզմների հետագա կատարելագործման հարցը:
«Պարոն Ավինյան, արագ կհավաքվեք, կորոշեք էս բոլոր տրված տեղեկությունների հետ կապված՝ որտեղ ինչ պետք է արվի, որպեսզի ճգնաժամային իրավիճակ չունենանք, պետք է գնալ կանխարգելելու եղանակով», – ասաց վարչապետը:
«Ուրախացողների համար էլ ասեմ՝ իրենց աչքը լույս, կարկուտն եղավ երեկ, բայց դե լավ պրծանք երեկվա կարկուտից», – ասաց Ցոլակյանը՝ ավելացնելով, որ կարկուստ սպասվում է նաև այսօր և վաղը:
Գյուղնախարարի պաշտոնակատար Գեղամ Գևորգյանն արձագանքեց, որ կարկուտը երեկ սարսափելի չի եղել ու լուրջ վնասներ չկան:
«Մենք կարո՞ղ ենք ասել, որ ցրտահարության վտանգը հաղթահարել ենք, թե վտանգ կա», – հետաքրքվեց Նիկոլ Փաշինյանը:
Ի պատասխան Ցոլակյանն ասաց, որ ապրիլի 20-ին և 21-ին ջերմաստիճանը կիջնի ամենաշատը, բայց «99 տոկոսով սպասում ենք, որ վտանգ չի լինի»: