Թուրքիայի արտգործնախարարության խոսնակ Համի Աքսոյը, անդրադառնալով «Իսլամական պետություն» ահաբեկչական խմբավորման ղեկավար Աբու Բաքր ալ Բաղդադիի վերացման ամերիկյան գործողությանը, հայտարարել է, որ Ալ Բաղդադին Թուրքիայի, մարդկության և իսլամի մեծագույն թշնամիներից էր: Այս մասին տեղեկացնում է թուրքական NTV հեռուստաընկերության կայքը:
«Ալ Բաղդադին Թուրքիայի, մարդկության և իսլամի մեծագույն թշնամիներից էր: Թուրքիան ահաբեկչության դեմ պայքարող կոալիցիայի ամենաակտիվ երկրներից մեկն է և պայքարել ու պայքարելու է ահաբեկչության և նման ահաբեկիչների դեմ»,-նշել է Աքսոյը:
Հիշեցնենք, որ երեկ՝ հոկտեմբերի 27-ին, ամերիկյան հատուկ գործողության հետևանքով սպանվել է Իսլամական պետության առաջնորդ Աբու Բաքր ալ Բաղդադին։ CNN-ի հաղորդմամբ՝ տեղեկություն կա, որ նրա աճյունը կարող են նետել ծովը։
