Իրանի նախագահ Մասուդ Փեզեշքիանը հրաժարականի դիմում է ներկայացրել գերագույն առաջնորդ Մոջթաբա Խամենեիին։ Ըստ Iran International -ի հաղորդման՝ Փեզեշքիանը նամակում նշել է, որ Իրանի պետական կառավարման համակարգը դուրս է եկել իր հունից, իսկ երկրի առանցքային որոշումները գտնվում են Իսլամական հեղափոխության պահապանների կորպուսի (ԻՀՊԿ) հրամանատարների լիակատար վերահսկողության տակ։ Նախագահը պնդել է, որ իր կառավարությունը զրկված է իրական իշխանությունից, ինչն անհնար է դարձնում երկրի կառավարումը։
Իրանական պաշտոնական լրատվամիջոցները, մասնավորապես Tasnim -ը, կտրականապես հերքել են այս տեղեկությունը՝ այն որակելով որպես «ստի ֆաբրիկացիա» և արտաքին ուժերի կողմից սադրանք։ Նախագահի խորհրդական Մեհդի Թաբաթաբային ևս հերքել է լուրերը՝ շեշտելով, որ Փեզեշքիանը շարունակում է իր աշխատանքը։ Այս ամենը տեղի է ունենում այնպիսի ժամանակահատվածում, երբ Իրանի բարձրագույն ղեկավարությունը գտնվում է ճգնաժամային իրավիճակում, իսկ Խամենեիի գտնվելու վայրի և հասանելիության վերաբերյալ տեղեկությունները խիստ սահմանափակ են։
Փորձագետների կարծիքով՝ այս դեպքը վկայում է Իրանի ներքաղաքական իշխանական կառուցվածքի խորը ճգնաժամի մասին, որտեղ քաղաքացիական իշխանությունը գնալով ավելի է կախված դառնում անվտանգության և ռազմական կառույցներից։ Տնտեսական ծանր վիճակը և պատժամիջոցները, որոնք ԻՀՊԿ-ն փորձում է շրջանցել ստվերային մեխանիզմներով, ավելի են սրում հակասությունները նախագահի և ռազմական վերնախավի միջև։