Ամենայն Հայոց Կաթողիկոսն ընդունել է Լիբանանի պաշտպանության նախարարին

Սեպտեմբերի 20-ին Ն.Ս.Օ.Տ.Տ Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ էջմիածնում ընդունեց Լիբանանի Հանրապետության ազգային պաշտպանության նախարար Էլիաս Բու Սաաբի գլխավորած պատվիրակությանը՝ ուղեկցությամբ ՀՀ պաշտպանության փոխնախարար Գաբրիել Բալայանի:

Հանդիպմանն Ամենայն Հայոց Կաթողիկոսը գոհունակությամբ անդրադարձավ երկու երկրների միջև հարաբերությունների ընդլայմանն ու զարգացմանը: Վեհափառ Հայրապետը վստահություն հայտնեց, որ պաշտպանության նախարարի այցը Հայաստան կնպաստի առկա գործակցության առավել ամրապնդմանը:

Ամենայն Հայոց Կաթողիկոսը նաև ընդգծեց, որ հայ ժողովուրդը երախտապարտ է Լիբանանին, որ Հայոց Ցեղասպանությունից հետո Եղեռնից մազապուրծ հայերին հյուրընկալեց և հնարավորություն ընձեռեց, որպեսզի վերակազմակերպեն իրենց ազգային-հոգևոր կյանքը:

Իր հերթին Լիբանանի ազգային պաշտպանության նախարարը ուրախություն հայտնեց Մայր Աթոռ կատարած այցի առիթով, ապա խոսեց երկու նախարարությունների համագործակցության մասին:

Զրույցի ընթացքում անդրադարձ կատարվեց նաև Լիբանանի հայ համայնքին, երկու ժողովուրդների արժեքային ընդհանրություններին, և Մերձավոր Արևելքում տիրող իրավիճակին:

Վերջում Ամենայն Հայոց Կաթողիկոսը, արդյունավոր առաքելություն ցանկանալով նախարարին, մաղթեց, որ Լիբանանի ժողովուրդն ապրի խաղաղության մեջ և վերականգնի ծաղկուն իր կյանքը:

https://www.facebook.com/infoservicesofmothersee/posts/1161609834030986?__xts__[0]=68.ARDKw_hNSMJ-7cGlXLSsdR9RJYrGZkuE_Mon3xUMlK-KDF6_-ev3-7_usb8BpJgRmxR5qtT3XqevRSFtKM4z_mzH67tsnuWYGAXm-HGyRjJRZ1awvO-sQDSNdFxU8wRGKA5KM1n3L19lIE0Isu2anFnvDdzftj3Hh0VM0UJKyRluZvlRsdjr25IAC1GgAEWkddoPLqFpUOxAvb__0XHFV7fFt3TuoCIvqF9nEK9xjxDZgphkApYRguS_UDQzezT9lcw_5e7_IBqeUxYMjV3fUMZvFEJm5wuilchkTdI36XtCbdNKuTBI2PLBYOCX1ilE3TpZPECbcR4OsJc8E_pZNV7MiQ&__tn__=-R