Ամերիկայի Միացյալ Նահանգների Կոնգրեսի նախաձեռնած հետաքննությունը, որը վերաբերում է նախագահ Դոնալդ Թրամփի պաշտոնանկությանը, այս շաբաթ կենտրոնանալու է Սպիտակ տան վրա:
Հարցաքննվելու են մասնավորապես ԱՄՆ Ազգային անվտանգության խորհրդի գործող ու նախկին երեք պաշտոնյաներ:
Հետաքրքրական է հատկապես ԱՄՆ նախագահի՝ Ռուսաստանի ու Եվրոպայի հարցերով գլխավոր խորհրդական Թիմ Մորիսոնի հարցաքննությունը, որը տեղի կունենա հոկտեմբերի 31-ին։ Նշենք, որ հարցաքննությունը դռնփակ է լինելու։
Մորիսոնը գործող առաջին պաշտոնյան է, որը պատասխանելու է ամերիկյան խորհրդարանի ներկայացուցիչների հարցերին։
Հավելենք, որ հետաքննության նպատակը պարզելն է, թե արդյոք նախագահ Թրամփը օգտագործել է իր պաշտոնը՝ ելնելով անձնական կամ ներքաղաքական շահերից:
