ԱՄՆ Կոնգրեսի Ներկայացուցիչների պալատի կողմից Հայոց ցեղասպանության մասին բանաձևի ընդունումից հետո ազդեցիկ սենատորները հորդորում են, որ նույն բանաձևն ընդունվի նաև Սենատում։ Այս մասին գրում է Asbarez.com-ը:
Սենատի Ազգային փոքրամասնությունների ղեկավար Չաք Շումերը կոչ է արել Սենատում քննարկել և ընդունել Հայոց ցեղասպանությունը ճանաչող բանաձևը:
Նա նշել է, որ ինքը վաղուց էր հավատում, որ Հայոց ցեղասպանությունը տեղի է ունեցել:
«Թուրքերը չեն ցանկանում դա լսել, քանի որ ճշմարտությունը լսելը ծանր է: Եթե մենք դեմ չկանգնենք մի ցեղասպանությանը, մենք չենք կարող դիմագրավել ոչ մեկին»,-ասել է Շումերը լրագրողներին:
Մասաչուսեթսից դեմոկրատ սենատոր Էլիզաբեթ Ուորենը Twitter-ի իր էջում գրել է, որ միանում է Ամերիկայի և ողջ Սփյուռքի հայկական համայնքին և նրանց հետ տոնում է Ներկայացուցիչների պալատի կողմից Հայոց ցեղասպանության ճանաչման բանաձևի ընդունումը:
«Ես հովանավորել եմ 150-րդ բանաձևի ներկայացումը Սենատ: Սենատը պետք է ընդունի այն»,-գրել է նա։
Մերիլենդից սենատոր Քրիս Վան Հոլլենը ևս կոչ է արել ընդունել 150-րդ բանաձևը՝ ընդգծելով, որ Ներկայացուցիչների պալատի մեծ քվեարկությունը երկար սպասված էր:
«Ժամանակն է, որ Սենատը նույնն անի: Ընդունելով պատմական փաստերը՝ այն չկրկնելու կարևոր քայլ է»,-նշել է սենատորը։
150-րդ բանաձևը 20 հովանավոր ունի: Շումերից ու Վան Հոլլենից բացի՝ բանաձևի հովանավորների թվում են սենատորներ Թամմի Դաքուորթը, Դայան Ֆայնսթայնը, Քորի Գարդները, Էդվարդ Մարքին, Գարի Փիթերզը:
Հիշեցնենք, որ հոկտեմբերի 29-ին ԱՄՆ Ներկայացուցիչների պալատը ճանաչել է Հայոց ցեղասպանությունը՝ ձայների բացարձակ մեծամասնությամբ։
Քվեարկությանը մասնակցած կոնգրեսականներից կողմ է քվեարկել 405-ը, դեմ՝ 11-ը, 3-ը մնացել են ձեռնպահ, իսկ 13 հոգի չի քվեարկել։
