fbpx
Իրավական

12:50 15/8/2019

Ամուլսարի հանքի շահագործման վերաբերյալ քրեական հետապնդման հիմքեր չկան. քննարկում կառավարությունում

Այսօր կառավարության նիստի ժամանակ ՀՀ քննչական կոմիտեի նախագահ Հայկ Գրիգորյանը, անդրադառնալով Ամուլսարի հանքի շահագործան հարցին, նշեց, որ հանքի շահագործման վերաբերյալ քրեական հետապնդման հիմքեր չկան:

«Ստացված եզրակացության վերլուծությունը թույլ է տալիս այս փուլում ենթադրել, որ 1 տարուց ավելի քննվող քրեական գործով, որը հարուցված է եղել Քրեական օրենսգրքի 282 հոդվածով, որևէ մեկին քրեական հետապնդման ենթարկելու հիմք չկա»,-ասաց Գրիգորյանը:

Վարչապետի այն հարցին, թե արդյո՞ք գործը կարճվելու է, Գրիգորյանը պատասխանեց.

«Որոշման վրա աշխատում ենք, այս փուլում մեղադրանք առաջադրելու և հետապնդման ենթարկելու հիմք չկա, այո՛, ուղղվածությունը դա է գործի քննության»:

Խոսելով Ամուլսարի շահագործման մասով փորձաքննության մասին՝ նա ներկայացրել եզրակացությունը:

«Ամուլսարի ստորգետնյա ջրերի և Ջերմուկի թերմալ աղբյուրների միջև որևէ կապ չկա: Ամուլսարի ստորգետնյա ջրերի և Սևանի միջև որևէ կապ չկա, սակայն երկրաշարժի պարագայում հնարավոր է թթվային դրենաժի կոնցետրացիայի ներթափանցում Սևանա լճի ավազան: Բայց այդ կոնցետրացիայի համակցությունը Սևանա լճի ավազանի ծավալներում աննշան կլինեն»,- ասաց Գրիգորյանը:

Նրա խոսքով՝ Ամուլսարի ստորգետնյա ջրերի ազդեցությունը հնարավոր է Որոտան, Արփա գետերի վրա, սակայն եթե «Լիդիան» ՓԲԸ-ն ձեռնարկի փորձագիտական խմբի կողմից ներկայացվող մեղմման 16 միջոց, այդ ռիսկերը կլինեն կառավարելի:

«Ընկերությունը երեկ ծանոթացել է եզրակացության հետ, մինչ այդ՝ նախաքննության ընթացքում, ներգրավված են եղել որպես կողմ և աշխատել փորձագետների հետ: «Լիդիան»-ի փորձագետները պատրաստ են մեղմման 16 միջոցներից 15-ը կիրառել: 10-ն արդեն կիրառվում է, 5-ը պատրաստ են հետագայում կիրառել: Մեղմման մեկ միջոցն է, որ դեռ քննարկվում է: Համաշխարհային բանկից «Լիդիան» ՓԲԸ-ն գումար ստանալու համար պետք է համապատասխանեցնի գործունեությունը AFC ստանդարտին: Դա նախատեսում է, որ հանքի օգտագործումից հետո 100 տարի պետք է մեղմման միջոցներ կիրառեն: Փորձագետներն առաջարկում են առաջնորդվել Նևադայի ստանդարտով, որը նախատեսում է մեղմման միջոցները կիրառել 500 տարի», – ասաց նա:

Նա նշեց նաև, որ 100 տարուց ավելի մեղմման միջոցների կիրառումից «Լիդիանը» չի հրաժարվում, եթե դրա անհրաժեշտությունը հետագայում կլինի:

Վարչապետ Փաշինյանն արձագանքեց. «Կառավարության ներկայացուցիչները կծանոթանան ամբողջական փաստաթղթին և դրա արդյունքում կգանք որևէ եզրակացության»:

Վերեվ