Ամերիկայի Միացյալ Նահանգները, Եվրամիությունը, միջազգային իրավապաշտպան կազմակերպությունները դատապարտել են Ռուսաստանի իշխանություններին նախօրեին Մոսկվայում բողոքի ակցիաների մասնակիցների ձերբակալությունների համար:
Ռուսաստանի մայրաքաղաքի օրենսդիր մարմնի ընտրություններին անկախ թեկնածուների գրանցման պահանջով բողոքի ակցիաների ժամանակ նախօրեին Մոսկվայում ձերբակալվել է ավելի քան 1300 հոգի, այդ թվում՝ ընդդիմադիր գործիչներ Դմիտրի Գուդկովը, Լյուբով Սոբոլը, Իվան Ժդանովը:
Ցույցը ցրելու ժամանակ ոստիկանությունը բռնություն է կիրառել ակտիվիստների նկատմամբ՝ ծեծի ենթարկելով մի քանի տասնյակ մարդկանց: Մասնավորապես, վնասվածքներ են ստացել ոստիկանական շների կողմից հարձակման ենթարկված ցուցարարները:
Հաղորդվում է, որ բացի ցուցարարներից ծեծի են ենթարկվել նաև ցույցը լուսաբանող լրագրողները: Ոստիկանները ջարդել են ֆոտոլրագրող Եվգենիա Ֆելդմանի քիթը, հարվածներ է ստացել РБК-ի թղթակից Ելենա Շելևան, իրավապահները ջարդել են Медиазоны-ի լրագրողի ձեռքը, ևս երկու օպերատորներ դեմքին հասցված հարվածների հետևանքով կոտրվածքներ են ստացել:
ԽՈՐՀՈւՐԴ Է ՏՐՎՈւՄ ԿԱՐԴԱԼ
