Կառավարության որոշմամբ ավագ դպրոցների այս տարվա ֆինանսավորումն ավելացվել է շուրջ 1 մլրդ դրամով:
Այդ մասին մարտի 11-ին ասել է ՀՀ կրթության եւ գիտության նախարար Արայիկ Հարությունյանն՝ ավագ դպրոցների խնդիրներին նվիրված աշխատանքային խորհրդակցության ժամանակ:
Գումարը հատկացվել է կրթության ոլորտի ֆինանսավորումից` այլ ծրագրերով նախատեսված աշխատանքների վերաբաշխման եւ տնտեսման հաշվին: Հատկացված հավելյալ միջոցները հնարավորություն կտան մեծացնել ավագ դպրոցների ֆինանսավորման գործակիցը, որն առաջացել էր դեռեւս անցյալ տարվանից` գործակցի փոփոխության հետեւանքով:
«Կարծում եմ` այս որոշումից հետո ավագ դպրոցների տնօրենները կկարողանան լուծում տալ դպրոցներում կուտակված հարցերին»,-նշել է Արայիկ Հարությունյանը:
Միաժամանակ նախարարն ընդգծել է, որ ավագ դպրոցների հաստիքացուցակների ուսումնասիրության արդյունքում ի հայտ են եկել որոշ խնդիրներ: Նա նշել է, որ սահմանվելու է հետեւողական եւ խիստ վերահսկողություն, որպեսզի ավելորդ, չհիմնավորված տեխնիկական հաստիքներով դպրոցների բյուջեները չծանրաբեռնվեն:
Առաջնահերթությունը, ըստ նախարարի, պետք է տալ դպրոցի բովանդակային բարելավմանը եւ կրթության որակի բարձրացմանը միտված աշխատանքներին:
Հաստատվել է 7 ավագ դպրոցների կապիտալ վերանորոգման ծրագիրը, որում ընդգրկվել են նորոգման առաջնային եւ հրատապ անհրաժեշտություն ունեցող դպրոցները: Միաժամանակ, Արայիկ Հարությունյանի խոսքով` նախարարությունը փորձում է լրացուցիչ միջոցներ ներգրավել դպրոցաշինության ոլորտում, եւ այդ նպատակով այժմ աշխատանքներ են տարվում բարեգործական կազմակերպությունների հետ:
Անդրադառնալով բովանդակային բարելավման ծրագրերին, նախարարը նշել է, որ այս տարի ավագ դպրոցները ստանալու են շուրջ 300 նոր լաբորատորիաներ` հագեցած ժամանակակից սարքավորումներով:
Նախարարն անդրադարձել է նաեւ դպրոցների կառավարման խորհուրդների ձեւավորման եւ տնօրենների ընտրության խնդրին` նշելով, որ բոլոր խորհուրդները պետք է ձեւավորվեն օրենքներին համապատասխան, լինեն լեգիտիմ եւ կայացնեն դպրոցների զարգացմանը միտված որոշումներ: Զուգահեռաբար փոփոխություններ են կատարվելու խորհուրդների կազմավորման եւ տնօրենների ընտրության կարգերում:
Աղբյուրը՝ mediamax.am