Խորհրդարան
16:30 05/03/2020

Շրիշակից ցածր չափանիշներն իրենց չափանիշներն են, լատենտ նախկիններն են․ Մարուքյանը՝ Պապոյանի ելույթի մասին

Ես իրեն պատասխանելու ոչ մի բան չունեմ, որովհետև մեր քաղաքական կալիբրները շատ տարբեր են: Այս մասին լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով «Իմ քայլը» խմբակցության պատգամավոր Գևորգ Պապոյանի ելույթին:

Նա նշեց, որ ԱԺ «Իմ քայլը» խմբակցության պատգամավորը շարունակում է ատելության խոսք տարածել, ինչը տարբեր ձևերով տարածվում է նաև խմբակցության աջակիցների կողմից Facebook-ում, սոցիալական տարբեր հարթակներում:

«Ամբիոնից անընդհատ «Էդմոն Մարուքյան», «Էդմոն Մարուքյան» ասելով՝ այդ մարդիկ փորձում են դառնալ հայտնի: Եթե դա է հայտնի դառնալու ճանապարհը, խնդիր չկա, թող դառնան հայտնի, բայց ես շարունակում եմ պնդել, որ այն ատելության միջավայրի համար, որ այսօրվա իշխանությունը ձևավորել և ամենօրյա ռեժիմով սնուցում է, պատասխանատվություն է կրելու»,-ասաց Մարուքյանը։

Նա հավելեց, թե Պապոյանը պետք է հպարտանա, որ Հանրապետական կուսակցության անդամ է եղել:

«Փոխանակ հպարտանա, որ հանրապետական է եղել, որովհետև ինքը հպարտ հանրապետական է եղել, ուզում է հիմա ասել՝ «չէ, ես չգիտեմ, առաքիչ եմ եղել»: Թեման բացվել է նրանից, որ երբ մեզ ասում են՝ նախկիններին ենք աջակցում, սուտ լուրեր են տարածում, մենք ասում ենք՝ «եղբայր, մենք նախկիններին չենք աջակցում, բայց այ դու նախկին ես»: Իրենք նախկին են, մեզ են ասում՝ նախկիններին աջակցող: Հանրապետականների լիքը նախագծերի Նիկոլ Փաշինյանն էլ է կողմ քվեարկել, ինչո՞ւ չեն հիշում: Շրիշակից ցածր չափանիշներն իրենց չափանիշներն են, լատենտ նախկիններն են»,-նշեց Մարուքյանը:

Նա ընդգծեց, թե ԱԺ ամբիոնից սկսել են անդրադառնալ սոցցանցերի հրապարակումներին, ինչը սխալ է:շ

«Խորհրդարանական մշակույթում չկա նման բան, որ խորհրդարանը դարձնենք Facebook: Մեկը Facebook-ում մի բան է գրում, մեկ էլ տեսնում ես՝ հաջորդ օրը ամբիոնից դրան պատասխանում են: Սա խորհրդարանն անլրջացնելու ամենավերջին տարբերակներից մեկն է»,-նշեց նա:

Մարուքյանի համոզմամբ՝ այսօր իշխանությունն ատելության թիվ 1 «բարձրախոսն» է դարձել՝ իր պատգամավորներով, աջակիցներով, համախոհներով:

«Մեղադրում էին, որ «Ոչ»-ի ճամբար չենք բացել, բայց տեսնում ենք, որ Էջմիածնում «Ոչ»-ի «հուղարկավորություն» են կազմակերպել: Բա որ մեկն էլ մի քար վերցնի, տա «Ոչ» քարոզողի գլխին, սպանի, ո՞վ է պատասխան տալու: Այ այդ թաղում անողների հետ ես բան չունեմ խոսելու: Դուք եկել ասում եք՝ թաղում անողին կարձագանքե՞ք: Ես թաղում անողին բան չունեմ ասելու: Թաղում անողը թող թաղումներով զբաղվի, վաղը, մյուս օրը թաղում անելու պատասխանը տա»,-ասաց նա:

Անդրադառնալով իր՝ պատգամավոր ընտրվելու և թեկնածուներից Վիկտոր Դալլաքյանի՝ ժամանակին արած հայտարարություններին, թե Մարուքյանը հաղթել է, քանի որ վայելել է Հանրապետական կուսակցության համակրանքը, Մարուքյանն արձագանքեց, որ Վիկտոր Դալլաքյանին երբ հաղթել է, Հայաստանում եղել է ցնցող դեպք, և դրանով քաղաքական համակարգում մեծ փոփոխություն է տեղի ունեցել, որովհետև այն անհնարինության կոմպլեքսը, որ անհնար է մեծամասնական ընտրակարգով ընտրվել, կոտրվել է:

«Շատ սխալ է ասել, որ ես Վիկտոր Դալլաքյանին եմ հաղթել, որովհետև 5 թեկնածու է եղել, և որևէ թեկնածուի դերը նսեմացնելը սխալ է: Բայց պարզ է, որ եթե ես լինեի «ոչ մեկը», լինեի «նիկտո», չէի կարող ընտրվել, բայց երբ այսօր ինչ-որ մեկը, որ «նիկտո» է, դա ուզում է վիճարկել կամ դրանով ուզում է սևացնել մեր անցած ճանապարհը, բնականաբար չի ստացվելու»,-նշեց նա։

ԱՄԵՆԱԴԻՏՎԱԾ

Վերեվ