Հայտնի բրիտանացի դերասան և երաժիշտ Դեմիան Լյուիսը պատրաստվում է իր երկրորդ՝ «Sweet Chaos» ստուդիական ալբոմի թողարկմանը հաջորդող համերգային շրջագայությանը Մեծ Բրիտանիայում։ Ինչպես հաղորդում է BBC-ն, «Homeland», «Band of Brothers» և «Wolf Hall» սերիալներից հայտնի դերասանն այժմ ակտիվորեն կենտրոնացած է երաժշտական կարիերայի վրա։
Գայ Չեմբերսի պրոդյուսերությամբ ստեղծված նոր ալբոմը, ըստ Լյուիսի, արտացոլում է այն «քաոսը», որը նա հաղթահարել է վերջին տարիներին։ BBC South East-ին տված հարցազրույցում դերասանը նշել է, որ այդ շրջանն իր համար եղել է «զարմանալիորեն ստեղծագործական»։ Նա ընդգծել է, որ եթե դերասանական աշխատանքը պահանջում է «ընկղմվել» այլ կերպարների մեջ և հանդես գալ որպես մեկնաբան, ապա երաժշտությունը նրան հնարավորություն է տալիս լինել սեփական ստեղծագործությունների հեղինակն ու կատարողը։
Լյուիսը, ով նախկինում թողարկել էր իր դեբյուտային «Mission Creep» ալբոմը, նշել է, որ չի զգում ավելի խոցելի երաժշտական բեմում, քան դերասանական հրապարակում։ Առաջիկա շրջագայությունը ներառում է Էդինբուրգ, Գլազգո, Լոնդոն և Բրայթոն քաղաքները։ Հունիսի 10-ին Բրայթոնի Resident երաժշտական խանութում Լյուիսն արդեն հանդես է եկել փոքր համերգային ծրագրով։