Դիմում Հայաստանի Հանրապետության և Արցախի Հանրապետության կուսակցություններին
Հարգելի գործընկերներ, «Արցախի Հանրապետության ճանաչում» քաղաքացիական նախաձեռնությունը ներքոգրյալ հայտարարության պահանջներով իրականացնում է հավաքներ, քննարկումներ և բողոքի միջոցառումներ՝ ի աջակցություն Բերձորի, Աղավնոյի և Սուսի։
Նախաձեռնությանը մասնակցելու համար կարող եք անցնել այս հղմամբ։
Հաշվի առնելով այն, որ կուսակցությունները հանդիսանում են պետության հասարակական-քաղաքական կյանքի հիմնական մասնակիցներն ու ձևավորողները, ըստ այդմ՝ հիմնական պատասխանատուները, դիմում ենք ձեզ՝ պարզելու ձեր դիրքորոշումները և մոտեցումները ներքոգրյալ հայտարարության գնահատականների և պահանջների շուրջ, այդ թվում՝ ակնկալում ենք ձեր հստակ քաղաքական գնահատականները ինչպես Արցախում տիրող իրավիճակի, այնպես էլ Արցախում ռուսական խաղաղապահ առաքելություն իրականացնող զորքերի գործունեության մասով՝ հաշվի առնելով Խծաբերդի, Փառուխի և ռուսական խաղաղապահների վերահսկողության տակ գտնվող այլ տարածքների հետ կապված տարհանումները, սպանությունները և գերեվարումները։
Հրատապությունից ելնելով՝ խնդրում ենք հնարավորինս սեղմ ժամկետներում արձագանքնել մեր դիմումին։
«Արցախի Հանրապետության ճանաչում» քաղաքացիական նախաձեռնության հայտարարությունը ստորև.
«Հաշվի առնելով 2020 թվականի Արցախյան 2-րդ պատերազմով պարտադրված նոյեմբերի 9-ի հայտարարության դրույթները, որոնք հայտարարության հաջորդ իսկ պահից բազմաթիվ անգամներ անմարդկայնորեն խախտվել են Ադրբեջանի կողմից և արձանագրվել ինչպես Արցախի Հանրապետության ՄԻՊ, ՀՀ ՄԻՊ կողմից և զեկույցներն ուղարկվել միջազգային կառույցներին, ինչպես նաև արձանագրվել են շահագրգիռ միջազգային կառույցների և նրանց ներկայացուցիչների կողմից,
Հաշվի առնելով 2020 թվականի նոյեմբերի 9-ի պարտադրված հայտարարության 6-րդ կետի խախտմամբ Բերձոր, Աղավնո և Սուս համայնքների բնակչության առաջ դրվում է ապօրինի պահանջ, ըստ որի պարտադրում են հայ բնակչությանը լքել իրենց հայրենի տները, նպատակ հետապնդելով խաթարելու Արցախը Հայաստանին միացնող Լաչինի մարդասիրական միջանցքի կարգավիճակը,
Հաշվի առնելով Արդբեջանի կողմից շարունակվող հայատյաց, ահաբեկումներով, սպանություններով, պատանդներ վերցնելով իրականացվող ռազմականացված քաղաքականությունը, այդ թվում՝ ուղղված Արցախի Հանրապետության և Լաչինի մարդասիրական միջանցում ապրող խաղաղ բնակչության դեմ, ինչպես նաև մահաբեր ԱԹՍ-ներով հարձակումները Արցախում տեղակայված հայկական օրինական ուժերի վրա,
Հաշվի առնելով Ռուսաստանի Դաշնության կողմից խաղաղապահ առաքելություն իրականացնող ուժերի դիտավոր անտարբերությունը, անգործությունը և ուշացած արձագանքը Ադրբեջանի կողմից էթնիկ զտումներին, հայ բնակչության սպանություններին, ունեզրկումներին, հողազավթումներին, ահաբեկչություններին, պատանդառություններին,
Պահանջում ենք Հայաստանի Հանրապետության կառավարությունից և Արցախ Հանրապետության կառավարությունից՝
-չտալ նոյեմբերի 9-ի հայտարարության վեցերորդ կետի ձևակերպումների այնպիսի մեկնաբանություններ, որոնք բացակայում են այդ կետից, այն է՝ Բերձորի, Սուսի և Աղավնոյի բնակիչների «տարհանումն» իրենց տներից, որպես վերոնշյալ հայտարարության իրականացում։ Հայտարարության մեջ նշված է, որ միջանցքով (ռուսերեն տարբերակ), միջանցքի երկայնքով (հայերեն տարբերակ) նոր ճանապարհի նախագիծ է ստեղծվելու կողմերի համաձայնությամբ, մինչև 2023 թվականը, ինչը չի բացառում, որ նոր միջանցքը պետք է ներառի Բերձոր, Աղավնո և Սուս հայկական բնակավայրերը։ Ընդ որում, կողմերի միջև գոյություն չունի պայմանավորվածություն նախագծի վերաբերյալ և նշյալ հայտարարությամբ չի կարող իրականացվել առանց քաղաքացիների, ներառյալ Լաչինի մարդասիրական միջանցքում գտնվող քաղաքացիների անվտանգության երաշխավորմամբ։
-չտրվել ադրբեջանական ահաբեկումներին և չթողնել Արցախի բնակիչներին առանց քաղաքական պաշտպանության։ Այդ թվում՝ թույլ չտալ Արցախի Հանարպետության իշխանությունների որևէ թևին, որպեսզի իրենք իրականացնեն քաղաքացիների «տարհանման» ծրագիր, որը ոտնահարում է քաղաքացիների համամարդկային ազատություններն ու իրավունքները։
-մերժել հանձնողական քաղաքականությունը, որը իրականացվում է իշխանությունների ներսի և արտաքին որոշ ուժերի ճնշումների արդյունքում։
-կազմակերպել ու օժանդակել Արցախի բնակչության, այդ թվում՝ Լաչինի մարդասիրական միջանցքի անվտանգությունն ու պաշտպանությունը, թույլ չտալով խաթարել մարդասիրական միջանցքի կարգավիճակը։
-չապավինել բացառապես ռուսական խաղաղապահներին, որոնք իվիճակի չեն կատարել իրենց ստանցձնած խաղաղապահ առաքելությունը։
-ներգրավել Լաչինի մարդասիրական միջանցքում բազմազգ խաղաղապահ առաքելության՝ անվտանգությունից ելնելով, որպես էթնիկ զտումներից խուսափելու գործուն մեխանիզմ և համամարդկային ազատությունների և իրավունքների, այդ թվում կյանքի և սեփականության իրավունքների երաշխիք։
-բարձրաձայնել բոլոր գործընկեր երկրներում, միջազգային մամուլում Ադրբեջանի վարած մարդատյաց քաղաքականության, էթնիկ զտումների և ահաբեկչությունների ու շանտաժի մասին, որն Ադրբեջանն իրականացնում է ռուսական կառավարության լուռ համաձայնության պայմաններում՝ հող նախապատրաստելով Արցախի Հանրապետության ճանաչման համար։
«Արցախի Հանրապետության ճանաչում» քաղաքացիական նախաձեռնություն
Նախաձեռնությունը բաց է բոլոր քաղաքացիների և մարդկանց համար
Նախաձեռնության հայտարարությանը կարող եք միանալ և աջակցել՝ ուղարկելով ձեր տվյալները նախաձեռնության էջին՝ fb.com/NKRecognition, էլ հասցեինք՝ recognitionofartsakh@gmail.com, տարածելով տվյալ հայտարարությունը, օժանդակելով կազմակերպչական գործերում»
