fbpx
Աշխարհ

ԵՄ երկրները վերջապես համաձայնության են եկել

ԵՄ երկրները Գերմանիայի պաշտպանության նախարար Ուրսուլա ֆոն դեր Լյայենին պաշտոնապես առաջադրել են Եվրահանձնաժողովի ղեկավարի պաշտոնում: Այս մասին թվիթերյան իր էջում գրել է Եվրախորհրդի ղեկավար Դոնալդ Տուսկը:

Ինչպես հաղորդում է DW-ն, Ուրսուլա ֆոն դեր Լյայենի օգտին քվեարկել է 27 մասնակից։ Ձեռնպահ է քվեարկել միայն Գերմանիայի կանցլեր Անգելա Մերկելը, քանի որ այդ թեկնածությունն աջակցություն չի ստացել սոցիալ-դեմոկրատների՝ Մերկելի կուսակցության կոալիցիոն գործընկերոջ կողմից:

Երկար քննարկումներից հետո ԵՄ-ն փոխզիջումային որոշում է կայացրել՝ ԵՄ առանցքային պաշտոններում առաջադրել քաղաքական գործչի, որը չի մասնակցում պաշտոնական մրցավազքին: Այդ քաղաքական գործիչն է եղել Ֆոն դեր Լյայենը:

Նա կփոխարինի Ժան Կլոդ Յունկերին, որը ղեկավարում էր Եվրահանձնաժողովը 2014 թվականի նոյեմբերի 1-ից:

Բացի դրանից՝ եռօրյա բանակցություններից հետո ԵՄ կառավարությունների եւ պետությունների ղեկավարները հստակեցրել են եվրոպական այլ առանցքային պաշտոնների համար թեկնածուներին:

Այսպիսով, Բելգիայի վարչապետի պաշտոնակատար Շառլ Միշելը Եվրախորհրդի ղեկավարի պաշտոնում կփոխարինի Դոնալդ Տուսկին:

Իսպանացի քաղաքական գործիչ Ժոզեպ Բորելը, ինչպես ակնկալվում է, կդառնա ԵՄ արտաքին գործերի եւ անվտանգության քաղաքականության հարցերով գերագույն հանձնակատար՝ փոխարինելով Ֆեդերիկա Մոգերինիին:

Իսկ Արժույթի միջազգային հիմնադրամի տնօրեն Քրիստին Լագարդն առաջադրվել է Եվրոպական կենտրոնական բանկի ղեկավարի պաշտոնում: 2011 թվականից այդ պաշտոնը զբաղեցնում էր իտալացի Մարիո Դրագին:

Պաշտոնապես կադրային փոփոխությունները պետք է հավանություն ստանան Եվրախորհրդարանի կողմից: Եթե պատգամավորները չեղարկեն դրանք, ապա թեկնածուների որոնման գործընթացը կվերսկսվի:

ԱՄԵՆԱԴԻՏՎԱԾՆԵՐԸ

ՎԵՐ