Քաղաքապետ Հայկ Մարությանին անվստահություն հայտնելու հարցով հրավիրված Երևանի ավագանու արտահերթ նիստի ժամանակ նաև Մարությանը խոսքով հանդես եկավ։ Նա նշեց, որ իր խոսքն ուղղում է երևանցիներին։
Նա ասաց, որ նման դեպք տեղի է ունենում Երևանի պատմության մեջ առաջին անգամ, երբ քաղաքապետին անվստահություն են հայտնում։ Նրա խոսքով՝ թվում է, թե դրա համար պետք է լինեն ծանրակշիռ պատճառներ, բայց այդպիսիները չկան ու պատճառն այն է, որ ինքը դուրս է եկել ՔՊ կուսակցությունից։
Մարությանը նշեց, որ ընտրություններում հաղթել է դաշինքը, հեղափոխությունը, հեղափոխական թիմը։ Նրա խոսքով՝ իրեն անվստահություն հայտնելու հիմքում դրվում է ՔՊ-ից ու «Իմ քայլից» դուրս գալը, բայց վերջին նշվածը կեղծիք է, քանի որ ինքը շարունակում է մնալ ֆրակցիայի անդամ։
Քաղաքապետն ասաց, որ այդ մարդիկ փորձում են սեփականաշնորհել հեղափոխությունը, իսկ ՔՊ-ն դարձնել հեղափոխական արժեքների միակ կրողն ու ժառանգորդը, ինչն անընդունելի է իր ու իր նման հազարավոր մարդկանց համար։
