Հայ հեծանվորդները պատրաստվում են նոր մրցաշրջանին

Հայաստանի առաջատար հեծանվորդները դեռևս անցյալ տարեվերջից սկսել են 2019թ. մրցաշրջանի նախապատրաստությունը:

Այս մասին ՀԱՕԿ լրատվականին տեղեկացրել է ՀՀ հեծանվային սպորտի ֆեդերացիայի փոխնախագահ, ՀՀ սպորտի նախարարության հանրապետական մարզադպրոցի տնօրեն Մարտին Շարբաթյանը: 

Այս փուլում մարզչական խորհրդի որոշմամբ անցկացվում են ընդհանուր ֆիզպատրաստականությունը բարելավող պարապմունքներ:

Բարենպաստ եղանակի դեպքում մարզումներն ընթանում են համապատասխան խճուղիներում: Մարզումներում ընդգրկված տարբեր տարիքային խմբերի հեծանվորդները, նրանց թվում` Եվրոպայի երիտասարդների կրկնակի չեմպիոն Էդգար Ստեփանյանը: 

Զուգահեռաբար մասնագետ վարպետները կատարում են մարզագույքի վերանորոգման աշխատանքները, որի համար ձեռք են բերվել անհրաժեշտ բոլոր պահեստամասերը: 

Հավելենք, որ մրցաշրջանի առաջին մեկնարկը կտրվի մարտին, Երևանում՝ խճուղային հեծանվավազքով:

Փոխանցում է armsport.am-ը։