fbpx
Հասարակություն

Հայաստանում երկրորդ համաշխարհային պատերազմի 363 մասնակից է ապրում

Հայաստանում ապրիլի 1-ի դրությամբ Հայրենական մեծ պատերազմի 363 մասնակից է ապրում: «Արմենպրես»-ի հետ զրույցում այս մասին ասել է ՀՀ վետերանների միավորման խորհրդի նախագահ, գնդապետ Սիմոն Եսայանը: Նա նշեց, որ 5-6 վետերան արդեն հարյուրն անց են: Վետերանների թվով առաջին տեղում Շիրակի մարզն է:

Հայրենական մեծ պատերազմին ակտիվ մասնակցություն են ունեցել ոչ միայն տղամարդիկ, այլև իգական սեռի ներկայացուցիչները: «Հայրենական պատերազմին մասնակցել է 10 հազար հայ կին, որից 4000-ը Հայաստանից, մնացածը մյուս 15 հանրապետություններից, արտասահմանից և, իհարկե, Արցախից: 41 կին վետերան ողջ է»,-հավելեց նա:

Խոսելով Հայաստանում վետերանների առջև ծառացած խնդիրներից՝ Եսայանը նշեց, որ իր համար ամենացավոտը արդեն երկու տարի վետերաններին Արզնիում հանգստի ուղեգրեր չտրամադրելն է:

«Ամեն տարի 50 ուղեգիր էին տրամադրում: Անցյալ տարի ես ուզել եմ ընդամենը 30-ը, ինչին ի պատասխան սոցիալական ապահովության ծառայությունից պատասխանել են, որ գումար չլինելու պատճառով չեն կարող տրամադրել այդ ուղեգրերը: 30 վետերանները, ովքեր դիմել էին հանգստանալու ակնկալիքով, այդպես էլ մնացին առանց ուղեգրի: Մեր վետերանները Արզնիում միայն հանգստանում են, նրանց ոչ մի բուժում պետք չէ»,-ասաց նա՝ հավելելով, որ այս տարի ևս դիմել է 30 ուղեգրի համար, սակայն գործընթացը փաստաթղթերի պատճառով ձգձգվում է:

Վետերաններին հուզող հաջորդ խնդիրը, ըստ Եսայանի, բուժսպասարկումն է: «Վետերանների 60 տոկոսն անկողնային են, և նրանց պետք է անընդհատ բուժսպասարկում: Սա դժգոհություն է առաջ բերում, վետերաններն ասում են, որ գումար են ուզում բուժման համար, նույնիսկ դիահերձման համար են գումար պահանջում, նման հարցեր կան, որոնք մեզ անհանգստացնում են»,-հավելեց նա:

Վետերանների միավորման խորհրդի նախագահն առանձնացրեց նաև վետերաններին տրամադրվող պատվովճարների հարցը, նրանց սոցիալական- կենցաղային պայմանների բարելավումը, քանի որ այսօր Հայաստանում առանց բնակարանների վետերաններ կան:

«Արդեն 4 տարի է մեր վետերանները յուրաքանչյուր ամիս իրենց թոշակի հետ ստանում են 50 հազար պատվովճար, բայց դրա հետ միասին մենք բավականին հետ ենք ԱՊՀ երկրների վետերանների սոցկենցաղային պայմաններից»,-հավելեց Եսայանը:

Նա նշեց, որ մայիսի 8-ին 10 վետերանի համար ընդունելություն էին կազմակերպել Հայաստանի Ազգային ժողովը, ՀՀ նախագահը, ինչից իրենք մեծ բավականություն էին ստացել:

Սիմոն Եսայանը հավելեց, որ 2020 թվականը կլինի հաղթանակի հոբելյանական տարի և հարցազրույցն ավարտեց Հայաստանի կառավարությունից մեծ սպասելիքներով ու ակնկալիքներով:

ԱՄԵՆԱԴԻՏՎԱԾՆԵՐԸ

ՎԵՐ