ՅՈՒՆԵՍԿՕ-ի քարտուղարության հրավերով ՀՀ մշակույթի նախարարության մշակութային արժեքների պահպանության գործակալության պետի տեղակալ Սերոբ Անտինյանը 2019 թ. մայիսի 20-23-ը մասնակցել է Փարիզում, ՅՈՒՆԵՍԿՕ-ի կենտրոնակայանում տեղի ունեցած ՄԱԿ-ի «Մշակութային արժեքների ապօրինի ներմուծումը, արտահանումը և դրանց նկատմամբ սեփականության իրավունքի փոխանցումն արգելելու և կանխելու մասին» 1970 թ. կոնվենցիայի Անդամ պետությունների հինգերորդ և Օժանդակ կոմիտեի յոթերորդ նստաշրջաններին։ Հայաստանն անդամակցում է կոնվենցիային 1993 թվականից: Կոնվենցիայի անդամ են նաև ՄԱԿ-ի անդամ 139 այլ պետություններ: Նստաշրջաններին կանոնավոր մասնակցությունը, կոմիտեների, հանձնաժողովների, հանձնախմբերի աշխատանքներում ներգրավվածությունը, մշակվող փաստաթղթերին, բանաձևերին, դիրեկտիվներին մանրամասն հաղորդակից լինելը հնարավոր են դարձնում Կոնվենցիայի արդյունավետ և նպատակային կիրարկումը և Հայաստանի Հանրապետության կողմից ստանձնած միջազգային պարտավորությունների պատշաճ կատարումը:
Կոնվենցիայի Անդամ պետությունների համաժողովները գումարվում են երկու տարին մեկ անգամ, որոնց ժամանակ քննարկվում և հաստատվում են Օժանդակ կոմիտեի, աշխատանքային տարբեր խմբերի կողմից մշակված ուղեցույցները, բանաձևերը, խորհրդատվական և այլ փաստաթղթերը, որոնք ապահովում են պետությունների կողմից Կոնվենցիայի արդյունավետ կիրարկումն ու հաշվետվողականության ձևերը: Այս նստաշրջանին տեղի են ունեցել ղեկավար մարմինների ընտրություններ, ներկայացվել և հաստատվել են Քարտուղարության զեկույցները, Կոնվենցիայի կենսագործման արդյունավետության բարձրացման ուղղությամբ պետությունների ներկայացրած առաջարկությունները: Մի շարք անդամ երկրների կողմից ներկայացվել են կոնվենցիայի կիրարկման լավագույն փորձը:
Կոնվենցիայի Անդամ պետությունների Օժանդակ կոմիտեի նստաշրջանները հրավիրվում են ամեն տարի: Օժանդակ կոմիտեի անդամ են Կոնվենցիային միացած երկրներից 18-ը միայն: Հայաստանն անդամակցում է կոմիտեին 2015 թվականից: Համաժողովին քննարկվել են մշակութային արժեքների արտահանման գործընթացներում միջազգային համագործակցության (INTERPOL, ICOM, UNIDROIT, WCO), փորձի փոխանակման հարցերը, ինչպես նաև ներկայումս մեզ հետաքրքրող մի շարք խնդիրներ՝ կապված մաքսային մարմինների հետ համատեղ կազմակերպվելիք վերապատրաստման դասընթացների անցկացման հնարավորությունների հետ:
Նստաշրջանների մասնակցությունը հնարավորություն է ակտիվորեն ներգրավվել անդամ երկրների համար ընդունվող փաստաթղթերի կազմման, լրամշակման և խմբագրման գործընթացներում: Ավելին, գործադիր կոմիտեներում ընդգրկվածությունը, որոնցում անդամակցում է միայն 18 կամ 22 պետություն, բացառիկ հնարավորություն է համապատասխան մասնագիտական առաջարկներով և քվեարկությամբ հետապնդել մեր երկրի քաղաքական և մշակութային շահերն ու հետաքրքրությունները միջազգային այդ կարևոր հարթակում:
Այս մասին տեղեկանում ենք ՀՀ մշակույթի նախարարության պաշտոնական կայքից։
