ՀՀ-ում ԵՄ պատվիրակության ղեկավար, դեսպան Պյոտր Սվիտալսկին այսօրվա մամուլի ասուլիսի ժամանակ անդրադարձել է ՀՀ արդարադատության ոլորտին` նշելով, որ այն այժմ ավելի լավ վիճակում է, քան իշխանափոխությունից առաջ:
«Դատաիրավական ոլորտի բարեփոխումների համար ամենակարևորն այն է, որ հասարակությունը վստահություն ունենա: Հայաստանն սկսել է շատ ցածր մակարդակի վստահությունից, հանրային վստահության մակարդակն արդարադատության համակարգի նկատմամբ շատ ցածր է այլ երկրների համեմատ»,-ասել է Սվիտալսկին:
Միաժամանակ նա ասել է, որ ՀՀ-ում այժմ տեղի ունեցող դատական աղմկոտ դատավարությունների առումով իրենք չեն կարող անհատական հայտարարություններ անել, սակայն պարզ է, որ յուրաքանչյուր ոք կարող է դիմել ՄԻԵԴ-ին` արդարադատություն ապահովելու համար:
«Նոր Հայաստանում պետք է լինի թափանցիկություն դատարանների աշխատանքի առումով: Մենք պետք է վստահենք ՀՀ դատական համակարգին, նրանք պետք է հարգեն եվրոպական արդարադատության չափանիշներին»,-ասել է Սվիտալսկին:
Անցումային արդարադատության վերաբերյալ դեսպանն ասել է, որ դրա որոշումը միայն հայերինն է. դրսից ցանկացած միջամտություն կխանգարի: