Hocus Pocus խումբը ձևավորվել է 1995 թ.ին, Ֆրանսիայում։ Այն իր մեջ ներառում է տարբեր ոճեր՝ հիփ-հոփ, ֆանկ, սոուլ, էլետրո և ջազ։ Գործերում նկատելի են նաև անգլիական, ֆրանսիական և ակուստիկ էլեմենտներ։
Hocus Pocus-ի գործերը ունեն շատ դրական և թեթև մթնոլորտ։ Երգերում հիմնականում ներկա են ռեփի և հիփ-հոփի տարրեր։ Գործերը լիովին առանձնանում են այդ ոճով ստեղծագործող ուրիշ երաժիշտների գործերից՝ իրենց հետաքրքիր և անսովոր համադրությունների շնորհիվ։
Խմբի ելույթները, գործերը համապատասխանում են իրենց անվանը՝ Hocus Pocus. խաբկանք, մոգություն։ Նրանց յուրահատուկ բեմադրությունները համադրվում են էլեկտրոնային, ջազային երաժշտության և ռեփի հետ՝ ստեղծելով մոգական տրամադրություն։ Այդ իսկ պատճառով էլ նրանց ունկնդիրները տարատեսակ են՝ ջազի սիրահարներից, մինչև ռեփի սիրահարներ։
Խմբի ամենանոր ալբոմներից է 16 pieces-ը, որի մեջ պարունակվում է 16 գործ։ Այն թողակվել է 2010 թ.ի մարտի 15-ին։ Ալբոմը բազմաթիվ հղումներ ունի տարբեր հայտնի մարդկանց՝ Մայքլ Ջեկսոնին, ԱՄՆ-ի նախագահ Քենեդիին, ֆրանսիացի երգահան Սերժ Գենսբուրգին, Ռենոյին, Կլոդ Նուագրոնին և այլն։ Ալբոմում ընդգրկված բոլոր երգերն էլ ինքնատիպ են, բայց այս 5 երգերը ամենաշատն են ընդգծում ալբոմի տրամադրությունն ու իմաստը.
I Wanna Know
Երգի հերոսը չափազանց հետաքրքրասեր է և ցանկանում է իմանալ, թե տարբեր բաներ այս կյանքում ինչու՞ և ինչպե՞ս են տեղի ունենում։ Օրինակ, թե ո՞վ է սպանել Քենեդիին, ինչու՞ են ուսուցիչները ավելի քիչ գումար վաստակում քան ժամանցի ոլորտում աշխատող մարդիկ, ինչու՞ է հարկավոր Ֆեյսբուքը, որպեսզի ընկերների հետ շբվենք և այլն։ Նա անհանգստանում է պետական և հասարակական համակարգերի, անարդարության և չզարգացվածության համար։
WO-OO
Այս գործում հերոսը պատմում է իր տեսած երազի մասին։ Երազը այնքան անհեթեթ է, որ արժանի է Ջ. Մալկովիչի (դերասան) և Զ. Ֆրեյդի (հոգեբան) ուշադրությանը։ Ամբողջ ընթացքում երացում ներկա են woo-oo տառերը և այդ տառերից բաղկացած տարբեր բառեր։ Նա չի կարողանում գիտակցել, թե ինչ խենթություններ են կատարվում իր հետ և նրան թվում է, որ գժվում է։
Portrait
Այն պատմում է 40-ամյա մի մարդու պատմություն։ Նրա անհատականությունը ձևավորվել է տարբեր ազդեցությունների տակ։ Նա խոսում է տարբեր դիալեկտներով, նրա վրա մեծ ազդեցություն են թողել ջազի հանճարներից՝ Ջ. Կոլտրեյնը, երգիչներ՝ Միննի Րիպերտոնը և Մ. Ջեքսոնը և այլոք։ Նա բազմաթիվ մասնիկներ է իր մեջ կրում, կարող է շատ տարբեր լինել և հպարտ է դրանով։ Նա այն է, ինչ կա։ Ո՛չ ավել, ո՛չ պակաս։
Marc
Այն պատմում է Մարկի մասին, ով խորհրդանշում է յուրաքանչյուրիս բացասական, ոչ այնքան մաքուր կողմերը։ Մարկը շահամոլ է, ալկոհոլի հանդեպ ունի մեծ սեր և խաբեբա է։ Մարկը հերոսի եղբայրն է, շողքը, մի մասը։ Առանց Մարկի չկա նաև նա։
Այս երգը ցույց է տալիս, որ մեր անհատականությունները ձևավորում են ո՛չ միայն մեր դրական կողմերը, այլև բացասական։ Առանց մեր բասական կամ ոչ այնքան կատարյալ կողմերի մենք կլինեինք անհետաքրքիր, անբովանդակալից և արհեստական։
100 Grammes De Peur
100 Grammes De Peur-ը (100 գրամ վախ) խոսում է համաշխարհային վախերի, ֆոբիաների, անհանգստության և դեպրեսիայի մասին։
Մարդիկ մեծ վախեր ունեն՝ կապված հիվանդությունների, առաջին հայացքից սիրահարվելու և ռասիզմի հետ։ Բայց պետք է լինել ուժեղ և դիմակայել յուրաքանչյուր խոչնդոտի, անհարմարության և վախի, միայն առաջ գնալ և վերածնունդ առնել։
Աննա Մարտիրոսյան
ԽՈՐՀՈւՐԴ Է ՏՐՎՈւՄ ԿԱՐԴԱԼ
