«Դիմադրություն» շարժման մասնակիցները Ֆրանսիայի հրապարակից երթով շարժվեցին դեպի կառավարության շենք՝ ներկայացնելու իրենց հետագա պահանջները: Կառավարության շենքի մոտ ՀՅԴ Հայաստանի գերագույն մարմնի ներկայացուցիչ Իշխան Սաղաթելյանը ցուցարարներին հորդորեց շենք մտնելու փորձ չանել:«Կառավարության վեց մուտքերը փակում ենք, ոստիկանության հետ կոնֆլիկտի մեջ չենք մտնում»,-հայտարարեց նա:
Հունիսի 3-ին ընդդիմադիր պատգամավորների նախաձեռնությամբ հրավիրված Ազգային ժողովի արտահերթ նիստը սկսելու համար քվորում չէր ապահովվել: Նիստի համար գրանցվել էր 33 պատգամավոր: Նիստը վարող ԱԺ նախագահ Ալեն Սիմոնյանը հայտարարեց, որ գրանցումը շարունակվում է մինչև անհրաժեշտ թվով պատգամավորների գրանցումը, բայց ոչ ավել, քան 4 ժամ: Նիստի օրակարգում մեկ հարց է՝ ընդդիմադիր «Հայաստան» և «Պատիվ ունեմ» խմբակցությունների ներկայացրած Հայ-ադրբեջանական և հայ-թուրքական հարաբերությունների կապակցությամբ հայտարարության նախագիծը: