«Հրապարակ» թերթը գրում է.
«Հայաստանի պետական տնտեսագիտական համալսարանի շուրջ կրքերը չեն հանդարտվում: Հիշեցնենք, որ ռեկտորի արդեն նախկին ժամանակավոր պաշտոնակատար Ռուբեն Հայրապետյանը փորձում էր փոխել դասախոսների ընտրության կարգը և նոր կանոնակարգ մտցնել: Մրցույթի արդյունքում նախկին դասախոսական կազմը դուրս էր մնում, և նոր դասախոսներ պետք է ներգրավվեին, ինչը բազում բողոքների տեղիք տվեց: Եվ քանի որ այդ ընթացքում նաև պարզվեց, որ ռեկտորի ԺՊ-ի դոկտորական ատենախոսության հետ կապված գրագողության կասկածներ կան, նախարար Արայիկ Հարությունյանի հրամանով Ռուբեն Հայրապետյանը հեռացավ, նրա փոխարեն ԺՊ նշանակվեց Դիանա Գալոյանը:
Այժմ բուհի ուսանողության մի մասը բողոքում է Հայրապետյանին հեռացնելու դեմ, և մրցույթներում հաղթած դասախոսների մի մասը հրաժարվում է աշխատել՝ Հայրապետյանից հետո: Եթե օրեր առաջ ՀՊՏՀ մի խումբ դասախոսներ էին բողոքի ակցիաներ անում կառավարության շենքի դիմաց, ապա վերջին օրերին այնտեղ են ռեկտորի պաշտոնակատարի հեռացումից դժգոհ ուսանողները: Ռեկտորի պաշտոնակատարի հեռանալուց հետո հեռանում են նաև նրա բերած կադրերը:
Մենք փորձեցինք զրուցել այն կադրերի հետ, որոնք հաղթել են մրցույթում, բայց որոշել են ռեկտորի նոր պաշտոնակատարի՝ Դիանա Գալոյանի հետ չաշխատել և արդեն հայտարարել են, որ չեն մտնելու ՀՊՏՀ:
Մեզ հետ զրույցում Արմինե Յարալովան, ով հայտարարված մրցույթում հաղթողներից մեկն է և Կենտրոնական բանկի աշխատակից, նշեց. «Նախ ես այնտեղ հայտնվել եմ, քանի որ հավատացել եմ, որ Ռուբեն Հայրապետյանն ինչ-որ փոփոխությունների ծրագիր է սկսել, բարեփոխումներ է սկսել, որոնք 30 տարում այդպես էլ չէին իրականացվում: Չասեմ՝ նրա խնդրանքով, բայց, համենայնդեպս, դիմել եմ մրցույթի համար՝ փորձելով աջակցել իրեն: Նախարարի կայացրած որոշումն առնվազն անարդար էր: Անարդար էր այն առումով, որ նրանց հիմնավորումը ուղղակի այս պարագայում զուտ ատենախոսության հետ խնդիրներն են: Իմ սուբյեկտիվ կարծիքով՝ սա ուղղակի պատճառ է: Ես էլ եմ ծանոթ այդ ատենախոսություններին և կարող եմ փաստել, թե ինչքանով է բարձր նրա ատենախոսությունը մյուսների ատենախոսությունների մակարդակից»:
Արմինե Յարալովան հավելեց, որ պատրաստվում էր դասավանդել «Տնտեսական քաղաքականություն և մակրոտնտեսագիտություն» առարկան»:
ԱՄբողջական հոդվածը կարող եք կարդալ թերթի այսօրվա համարում
