ՀՀ ԱԺ-ն ներկայացրել է ԱԺ պատգամավոր Հռիփսիմե Գրիգորյանի կոչը միջազգային գործընկերներին․
«Շնորհակալություն, մեծարգո նախագահող,
hարգելի գործընկերներ,
hարգելի միջազգային գործընկերներ,
բոլորի ուշադրությունն եմ հրավիրում հենց այս րոպեներին ՀՀ արևելյան սահմանների հանդեպ ադրբեջանական հերթական ռազմական ոտնձգությունների, այն է՝ հայկական դիրքերն այս պահին ռմբակոծելու սադրիչ գործողություններ վրա:
Այս հերթական ապօրինի ռազմական գործողությունները տեղի են ունենում ի շարունակություն նախօրեին Հայաստանի Հանրապետության ինքնիշխան տարածք ներխուժած ադրբեջանական զինուժի գործողությունների: Ինչպես հայտնի է ադրբեջանական զինտեխնիկան և զորքը բանակցությունների արդյունքում նոյեմբերի 15-ին դուրս են եկել ՀՀ տարածքից, միաժամանակ ՀՀ ԶՈւ ստորաբաժանումները ևս դուրս են բերվել այդ տարածքից/դիրքերից: Այնուամենայնիվ, նշված հատվածում շարունակում են ծավալված մնալ դեռևս այս տարվա մայիսին ՀՀ ինքնիշխան տարածք ներխուժած ադրբեջանական զինծառայողներ:
- ԱԺ-ն 2 նոր պատգամավոր ունի՝ մեկը ՀԴ-ից, մյուսը ՔՊ-ից
- Ղազինյանը նորից չընտրվեց ԱԺ հանձնաժողովի նախագահի տեղակալ
Մեր միջազգային գործընկերներին, այդ թվում՝ ՀԱՊԿ-ի, ԵԱՀԿ-ի, ԵԽԽՎ-ի, ԵՄ-ի մեր գործընկերներին կոչ ենք անում իրականացնել զսպման անհրաժեշտ գործողություններ՝ ուղղված ադրբեջանական հերթական սադրանքի դատապարտմանն ու հետագա գործողությունների կանխմանը:
Ցանկանում եմ շեշտել, որ ադրբեջանական ռազմական ագրեսիան ուղղված է Հայաստանի Հանրապետության ինքնիշխանության, տարածքային ամբողջականության դեմ, միաժամանակ սպառնալիք է տարածաշրջանային անվտանգությանն ու կայունությանը և հակասում է 2020 թվականի նոյեմբերի 9-ի եռակողմ հայտարարության դրույթներին, խոչընդոտում տարածաշրջանային կոմունիկացիաների բացմանը և սահմանների դեմարկացիայի և դելիմիտացիայի գործընթացը մեկնարկին՝ էականորեն վտանգելով ողջ գործընթացը:
Վերահաստատելով Հայաստանի Հանրապետության իշխանությունների և ժողովրդի վճռականությունը հայրենիքի ինքնիշխանությունը, տարածքային ամբողջականությունը և անկախությունը պաշտպանելու գործում, կոչ ենք անում մեր միջազգային գործընկերներին հանդես գալ առավել հասցեական և թիրախային կոչերով՝ ուղղված ադրբեջանական ռազմաքաղաքական ղեկավարության անհեռատես և վտանգավոր գործողությունների դեմ, ինչի բացակայությունը կարող է ընկալվել իբրև մեր միջազգային գործընկերների անտարբերություն և ստանձնած հանձնառության բացակայություն»,- նշել է Հռիփսիմե Գրիգորյանը:
