Հուլիսի 10-ին ՀՀ ԱԺ պետական-իրավական հարցերի մշտական հանձնաժողովի արտահերթ նիստում՝ Վլադիմիր Վարդանյանի նախագահությամբ, երկրորդ ընթերցմամբ քննարկվել է Կառավարության հեղինակած «Մարդու իրավունքների եվրոպական դատարանում ՀՀ ներկայացուցչի մասին» ՀՀ օրենքի նախագիծն ու կից օրենքների նախագծերի փաթեթը:
ՀՀ արդարադատության նախարարի առաջին տեղակալ Արտակ Ասատրյանը հանձնաժողովականներին ներկայացրել է «Բարգավաճ Հայաստան» խմբակցության առաջարկությունը: Ըստ այդմ՝ Մարդու իրավունքների եվրոպական դատարանում ՀՀ ներկայացուցիչ կարող է նշանակվել 30 տարին լրացած, իրավաբանական կրթություն եւ առնվազն 5 տարվա մասնագիտական աշխատանքային փորձ ունեցող, ինչպես նաեւ մարդու իրավունքների վերաբերյալ ՀՀ օրենսդրությանը, միջազգային ակտերին, հայերենին եւ անգլերենին կամ ֆրանսերենին տիրապետող, միայն ՀՀ քաղաքացիություն ունեցող անձը: Հանձնաժողովականներն ընդունել են առաջարկությունը:
Քննարկված օրենքների նախագծերի փաթեթը ստացել է դրական եզրակացություն:
