Խորհրդարան

Ինչու՞ է այնպիսի տպավորություն, որ իշխանությունները, իբր, պատերազմի մեջ են լրատվամիջոցների հետ. Վահագն Թևոսյան

Աժ «Իմ քայլը» խմբակցության պատգամավոր, Հայաստանի հանրային հեռուստաընկերության լրատվական և վերլուծական հաղորդումների նախկին տնօրեն Վահագն Թևոսյանն իր ֆեյսբուքյան էջում գրել է.

«Ինչու՞ է այնպիսի տպավորություն, որ իշխանությունները, իբր, պատերազմի մեջ են լրատվամիջոցների հետ: Նախ չկա նման բան ընդհանրապես, իսկ իմ մասով մասնավորապես կարող եմ ասել. մենք չենք կռվում լրատվամիջոցների դեմ, մենք կռվում ենք լրատվամիջոցների համար՝ վատ լրագրության դեմ:

Վատ լրագրությունը.
1. Կենցաղային մակարդակի լաչառության ճանապարհով խեղում է վերաբերմունքը քննադատության հանդեպ, խառնում թացը չորին, ձևավորում անտարբերություն քննադատության նկատմամբ ընդհանրապես:
2. Անճիշտ տեղեկատվությամբ իջեցնում է ԶԼՄ՝ որպես կարևորագույն սթափեցնող ու վերահսկող օրգանիզմի հանդեպ վստահությունը:
3. Ֆաստֆուդային ու անառողջ սնունդի անալոգիայով թունավորում ու քայքայում է հանրություն անվանվող “օրգանիզմը”:

Այս ամենը կապ չունի խոսքի ազատության հետ: ԶԼՄ-ն հանրության, պետականության կարևորագույն բաղադրիչներից մեկն է, և նրա առողջությունից էականորեն կախված է նաև հանրության առողջությունը:

ԶԼՄ-ն ժամացույցի՝ րոպեներ ցույց տվող սլաքն է, լրագրությունը՝ այդ սլաքն աշխատեցնող դետալային համակարգը: Տարօրինակ կլինի աշխատող համարել այն ժամացույցը, որի րոպեներ ցույց տվող սլաքն անընդհատ հետուառաջ է գնում: Մենք չենք կարող կռվել սլաքի դեմ: Այն շատ պետք է ու հույժ կարևոր: Մենք կռվում ենք դետալների կոռոզիայի և մաշվածության դեմ, որ այդ սլաքն աշխատի: Սա բխում է բոլորիս շահերից՝ և՛ կառավարող ուժի, և՛ ընդդիմության, և՛ հանրության, և՛ պետության, և՛ հենց ԶԼՄ-ների: Միակ հակառակորդ կողմը վատ լրագրությունն է»:

ՎԵՐՋԻՆ ԼՈւՐԵՐ

ՎԵՐԵՎ