Իրանական իշխանություններն ազատ են արձակել Stena Impero բրիտանական լցանավը, որը կալանավորվել էր Հորմուզի նեղուցում Իսլամական հեղափոխության պահապանների կորպուսի ուժերի կողմից։ Այս մասին հաղորդում է TACC-ը։
Ինչպես ասել է Իրանի կառավարության ներկայացուցիչ Ալի Ռաբիին, բրիտանական լցանավի ազատ արձակման իրավաբանական ընթացակարգերն ավարտվել են։ Միևնույն ժամանակ, նա չի տեղեկացրել ճշգրիտ ժամկետը, թե երբ է նավը հեռանալու Իրանի ափերից։
«Մենք դեռ հաստատ չգիտենք, թե երբ կարող է լցանավը ծով դուրս գալ»,-ասել է Ռաբիին։
Կիրակի Հորմոզգան նահանգի նավահանգիստների և մերձափնյա ուղու դեպարտամենտի պետ Ալամորադ Աֆիֆիպուրն ասել էր, որ Stena Impero լցանավը ազատ կարձակվի առաջիկայում։
Հուլիսի 19-ին IRNA գործակալությունը տեղեկացրել էր, որ Stena Impero լցանավը բրիտանական դրոշի ներքո կալանավորվել է Հորմուզի նեցուցում այն բանից հետո, երբ անջատել է ճանաչման ավտոմատ համակարգի ընդունիչը և չի պատասխանել ԻՀՊԿ նախազգուշացմանը։ Համաձայն ԻՀՊԿ հայտարարության՝ նավը կալանավորվել է միջազգային կանոնների խախտման պատճառով, և ուղեկցվել էր մինչև ափ՝ ստուգման։ Ավելի ուշ իսլամական հանրապետության իշխանությունները հայտարարել էին, որ լցանավը ներգրավված է եղել իրանական ձկնորսական նավի հետ միջադեպին։
Սեպտեմբերի սկզբին Իրանի իշխանությունները թույլ տվեցին լցանավի անձնակազմի յոթ անդամի, որոնց մեջ՝ մեկ ռուսաստանցի, հեռանալ Իրանից և ուղևորվել Արաբական Միացյալ Էմիրություններ։ Դրանից հետո նավի վրա մնացել էր անձնակազմի 16 անդամ. դա նավի գործունեության ապահովման նվազագույնն է ծով դուրս գալու համար։