ԱՄՆ նախագահ Դոնալդ Թրամփի վարչակազմը խստացրել է իր դիրքորոշումը Իսրայելի վարչապետ Բենիամին Նեթանյահուի հանդեպ՝ պահանջելով Գազայի հատվածում հրադադարի պայմանների անվերապահ կատարում։ Այս մասին հայտնում է The New York Times թերթը։
Թերթի տվյալներով՝ հրադադարի համաձայնագրի ուժի մեջ մտնելուց հետո Թրամփը բարձրաստիճան պաշտոնյաների պատվիրակություն է ուղարկել Իսրայել՝ վերահսկելու հրադադարի պահպանման գործընթացը։ Թրամփի վարչակազմը նաև բանակցություններ է վարում մի շարք երկրների՝ Ինդոնեզիայի, Արաբական Միացյալ Էմիրությունների, Եգիպտոսի, Կատարի, Թուրքիայի և Ադրբեջանի հետ՝ Գազայում բազմազգ միջազգային ուժերի ձևավորման վերաբերյալ։ Սակայն ԱՄՆ-ն բացառել է ամերիկյան զորքերի ուղարկումը Գազա։Իսրայելի վարչապետ Բենիամին Նեթանյահուն հայտարարել է, որ Իսրայելն է որոշելու, թե օտարերկրյա որ ուժերին կթույլատրվի մասնակցել Գազայում նախատեսված միջազգային ուժերի կազմում։ «Մենք վերահսկում ենք մեր սեփական անվտանգությունը, և մենք նաև միջազգային ուժերի վերաբերյալ հստակեցրել ենք, որ Իսրայելը կորոշի, թե որ ուժերն են մեզ համար անընդունելի», – նշել է Նեթանյահուն։ԱՄՆ պետքարտուղար Մարկո Ռուբիոն, որը հրադադարի ռեժիմը պահպանելու նպատակով այցելել էր Իսրայել, հայտարարել է, որ միջազգային ուժերը պետք է կազմված լինեն «այն երկրներից, որոնց հետ Իսրայելը հարմարավետ է զգում»։The New York Times թերթի զրուցակիցների տվյալներով՝ Թրամփը ստիպել է Նեթանյահուին ներողություն խնդրել Կատարից՝ սեպտեմբերի 9-ին Դոհայում ՀԱՄԱՍ-ի գրասենյակին հասցված ավիահարվածի համար։ Սա կարող է վկայել երկու երկրների ղեկավարների հարաբերությունների բնույթի փոփոխության մասին։ Եթե Թրամփի նախագահության սկզբնական շրջանում Նեթանյահուն ստանում էր գործնականում անվերապահ աջակցություն, ապա այժմ ԱՄՆ վարչակազմը կարծես թե որդեգրել է ավելի խիստ մոտեցում։Իսրայելը, որը երկու տարի շարունակ շրջափակման մեջ էր պահում Գազան, շարունակում է վերահսկել անկլավ մուտք գործելու բոլոր ուղիները։ Ավելի վաղ Նեթանյահուն ակնարկել էր, որ դեմ կլինի թուրքական անվտանգության ուժերի որևէ դերակատարմանը Գազայում։
