Իսրայելի գիտնականները նախազգուշացնում են երկրի միջերկրածովյան ափերին մեծաքանակ մեդուզաների կենտրոնացման և հանգստացողների համար դրանց ներկայացրած վտանգի մասին:
Գրեթե բոլոր լողափերում այդ ծովային կենդանիների մասին հաղորդագրությունները տարածվել են մասնագիտացված meduzot.co.il կայքի միջոցով:
Իսրայելական բազմաթիվ լողափերում բարձրացվել են մանուշակագույն դրոշակները, որոնք այս տարվա նորամուծություններից են և զգուշացնում են վտանգի մասին:
Իսրայելի ափերի վրա հարձակվել են անողնաշարավորների երկու տեսակի ներկայացուցիչները՝ Pelagia noctiluca-ն ու Rhopilema nomadica-ն: Այդ տեսակների ներկայացուցիչների հետ հանդիպումը կարող է լուրջ վնաս հասցնել առողջությանը:
Մարդու մաշկի հետ հպման արդյունքում մեդուզայի շոշափուկն առաջացնում է լուրջ այրվածքներ և ալերգիա: Մեդուզայից հնարավոր է տուժել անգամ առանց անմիջական շփման. այդ կենդանիները ջրում արտադրում են այրող նյութեր, որոնք ևս սպառնում են այրվածքներ հասցնել մարդուն: Հատկապես վտանգավոր է, երբ այդ նյութը հայտնվում է մարդու աչքերում, ինչը կարող է հանգեցնել կուրության:
Բժիշկները զգուշացնում են, որ մեդուզայի հետ հպման հետևանքով ստացված այրվածքի տեղն անհրաժեշտ է լվանալ, սակայն ցանկալի է ոչ քաղցրահամ ջրով: Լավագույն տարբերակներից է մեդուզայի թույնը քացախով կամ կիտրոնահյութով չեզոքացնելը: Իսրայելի լողափերում փրկարարների մոտ առկա են այրվածքները մշակելու համար բոլոր անհրաժեշտ միջոցները, ավելին, հատուկ միջոցներ վաճառվում են նաև տեղի դեղատներում:
