ՌԴ արտաքին գործերի նախարար Սերգեյ Լավրովը Аргументы и факты լրատվամիջոցին տված հարցազրույցում խոսել է Թուրքիայի հետ հարաբերությունների մասին։
Լրագրողը Լավրովին հարցրել է թուրք գործընկերների գործունեության մասին։
Լավրովը պատասխանել է, որ մի շարք միջազգային հարցերի շուրջ Մոսկվան և Անկարան լուրջ տարաձայնություններ ունեն, սակայն դա չի խանգարում կողմերին քաղաքական երկխոսություն պահպանել և զարգացնել փոխշահավետ համագործակցությունը։
Լավրովը հավելել է, որ չնայած նրան, որ ԱՄՆ-ն ճնշումներ է գործադրել Թուրքիայի վրա, միևնույն է Թուրքիան ձեռք է բերել ռուսական ռազմական տեխնիկա։
Լավրովը խոսել է նաև Լեռնային Ղարաբաղում գործող ռուս-թուրքական համատեղ կենտրոնի մասին։
«Լեռնային Ղարաբաղի հակամարտության գոտում հունվարի 30-ից գործում է թուրք գործընկերների հետ համատեղ հրադադարի և բոլոր ռազմական գործողությունների վերահսկման կենտրոնը։ Այդ կենտրոնը զբաղվում է հնարավոր խախտումների մոնիթորինգով՝ բացառապես վիզուալ դիտման մեթոդներով»,- ասել է Լավրովը։
ՌԴ ԱԳ նախարարը հավելել է, որ չնվազեցնելով առկա տարաձայնությունները՝ Թուրքիայի հետ հարաբերություններում Ռուսաստանը հետագայում էլ կառաջնորդվի ընդհանուր շահերով։