Հայաստանի կինեմատոգրաֆիստների միության Facebook-ի պաշտոնական էջը գրում է, որ մահացել է «Մոսկվա» կինոթատրոնի տնօրեն, ՀՀ մշակույթի վաստակավոր գործիչ Մարտուն Ադոյանը:
«Ցավալի լուրն այսօր արձանագրեց տխուր իրողությունը: Կյանքի ու մահվան պայքարում մահը հաղթեց, ու Մարտուն Ադոյանը հրաժեշտ տվեց երկրային կյանքին:
Մեր շատ սիրելի Մարտուն Ադոյանը՝ «Մոսկվա» կինոթատրոնի անփոխարինելի տնօրենը, հարգանք վայելող կինոպրոդյուսերն ու մշակութային գործիչը, Հայաստանի կինեմատոգրաֆիստների միության, Ազգային կինոակադեմիայի անդամը, սիրված ընկերն ու գործընկերը, համեստ, նվիրյալ, գիտակ մարդը, լավ ընտանիքի գլուխը…
Շատ երկար կարելի է թվարկել Մարտուն Ադոյան մարդու առաքինությունները: Նա այն եզակի անձնավորություններից էր, որ իր կյանքի գործը համարեց կինոն, հայ կինոն, նվիրվեց կինոյին, ամեն ջանք ներդրեց կինոմիջավայրի ու կինոմշակույթի պահպանման ու զարգացման համար Հայաստանում:
Նրա բացառիկ ջանքերով էր նաև, որ վերապրեց «Մոսկվա» կինոթատրոնը՝ Հայաստանի համար ծանրագույն օրերին անգամ չթողնելով կինոյի առաջնագիծը: Նրա ջանքերով էր նաև, որ վերապրեց Գյումրիի «Հոկտեմբեր» կինոթատրոնը՝ մնալով մշակութային օջախ մշակութային քաղաքում: Նրա ջանքերով էր նաև, որ կայացան ու զարգացան հայկական կինոփառատոները, այդ թվում և «Ոսկե Ծիրան» միջազգային կինոփառատոնը՝ ամենածանր պայմաններում անգամ ապավինելով «Մոսկվա» կինոթատրոն մշակութային օազիսին:
Ի վերջո, նրա ջանքերով էր նաև, որ Երևանի խորհրդանիշ «Մոսկվա» կինոթատրոնը՝ իր բոլոր դժվարություններով ու խնդիրներով հանդերձ, մնաց Երևանի խորհրդանիշը:
Մեր հողի հետ ամուր արմատներով կապված ճշմարիտ հայ մարդ էր ՄԱՐՏՈՒՆ ԱԴՈՅԱՆԸ, կինոյի ճշմարիտ նվիրյալ ու մշակ, և նրա անունն ու գործը մշտապես մնալու են կինոյի, հայ կինոյի էջերում:
Խորապես ցավակցում ենք Մարտուն Ադոյանի ընտանիքին, հարազատներին, մերձավորներին, ընկերներին ու բարեկամներին նրա անժամանակ մահվան առթիվ»:
https://www.facebook.com/armenianunionoffilmprofessionals/photos/a.1774972146128801/2333302153629128/?type=3&__xts__%5B0%5D=68.ARCNb-NamqLQ7Hr90JIicClzBSwGRLl36d7-rdSfNuiukR9vlGb9Ur_hWN7WNSKW4Q5ii4K85ZHNRPbIXmyjrxbL_EVziRPXOXA9b1MnGuaiKH2wuJGKnhm4TOvWQgr5OeecyEbLB4TdRK72f1dCQypmiEM3atmeSNFL_5w_tVxf74EYLgDjGoAM5WvC1fXyxiLhc5D9BCtlrd7mWi9jbJRL3rnArU_gyw05hegu8AWKgonRG6PPr73twforOf1Y3l3dkSnDAO3LDtkXvKRijL_F37se-KeZ1Xua2VuwXkFoK6VSnsTyh9pQFTVLqELjSH7UC5uvV_5fJ06J5iSaqhwX4ixl&__tn__=-R
