Հայաստանի խորհրդարանի նախկին պատգամավոր, Դատական ակտերի հարկադիր կատարման ծառայության նախկին ղեկավար Միհրան Պողոսյանը, որը հետախուզվում է Հայաստանում, քաղաքական ապաստան չի ստացել Ռուսաստանում: Այս մասին հայտարարել է ՀՀ-ում ՌԴ դեսպան Սերգեյ Կոպիրկինը։
Դեսպանը նշել է, որ ինքը հակված չէ որևէ ենթատեքստ տեսնել այն փաստի մեջ, որ Հայաստանի մի շարք նախկին բարձրաստիճան պաշտոնյաներ թաքնվում են Ռուսաստանի Դաշնության տարածքում:
«Ասացեք ինձ, որտե՞ղ եք տեսնում այդպիսի միտում: Ես այն չեմ տեսնում: Եթե անձը գտնվում է Ռուսաստանում, դա չի նշանակում, որ ստացել է քաղաքական ապաստան: Ինչ վերաբերում է Պողոսյանին, ապա, իմ տեղեկություններով, մենք խոսում ենք իրավական ընթացակարգի մասին, անհրաժեշտ փաստաթղթերի տրամադրում»,- ասել է Կոպիրկինը ՝ պատասխանելով Ռուսաստանի Դաշնությունում Միհրան Պողոսյանի և պաշտպանության նախկին նախարար Միքայել Հարությունյանի վերաբերյալ հարցին:
«Ես որևէ միտում կամ ենթատեքստ չեմ տեսնում: Հայաստանի նոր իշխանություններին ուղղված հաղորդագրությունը պարզ է. մենք ռազմավարական դաշնակիցներ և գործընկերներ ենք, եղբայրական ժողովուրդներ և երկրներ: Ոչ մի դեպքում Ռուսաստանի դիրքորոշումն այս առումով չի փոխվել: Որքան հասկանում եմ, դա համահունչ է Հայաստանի ղեկավարության դիրքորոշմանը»,- ասել է Կոպիրկինը։
