Կառավարող Պահպանողական կուսակցության պատգամավորների թվից Մեծ Բրիտանիան Եվրամիության կազմում պահելու թունդ կողմնակիցները հայտնել են, որ հնարավոր է՝ պաշտպանեն կոշտ Brexit թույլ չտալու ընդդիմադիր Լեյբորիստական կուսակցության առաջնորդ Ջերեմի Քորբինի պլանը: Այս մասին հայտնում է The Times թերթը:
Հրատարակության տվյալներով՝ չնայած լիբերալ դեմոկրատների կողմից դրսևորվող սկեպտիցիզմին և մի քանի անկախ խորհրդարանականների թշնամանքին՝ պահպանողական պատգամավորները, որոնց դիմել է Քորբինը, հայտարարել են, որ ողջունում են նրա մոտեցումը և համաձայնել են հանդիպել նրա հետ։
«Ես կարծում եմ, որ նրանք, ովքեր ասել են, թե իրենք ամեն բան կանեն՝ խոչընդոտելու առանց գործարքի Brexit-ի հնարավոր երկարաժամկետ վնասին, պետք է լրջորեն վերաբերվեն այդ առաջարկությանը»,-ասել է պահպանողական Գութո Բեբը:
Ինչպես նշում է The Times-ը, Քորբինի նամակը, որը նա ուղարկել էր պահպանողական այն պատգամավորներին, որոնք հանդես են գալիս առանց Brexit-ի պայմանների վերաբերյալ համաձայնագրի ԵՄ-ից երկրի դուրս գալու դեմ, ստացել են բրիտանական կառավարության նախկին անդամներ Դոմինիկ Գրիվը, Օլիվեր Լեթվինը, Քերոլայն Սփելմանը և Նիք Բոուլզը, որն ավելի վաղ թորիների շարքերից հեռացել Է Brexit-ի պատճառով տարաձայնությունների ֆոնին:
Բոլոր չորսն էլ պատրաստակամություն են հայտնել հանդիպել լեյբորիստների առաջնորդի հետ, որպեսզի «քննարկեն հոկտեմբերի 31-ին առանց գործարքի դուրս գալու սցենար թույլ չտալու տարբեր ուղիները»:
Հիշեցնենք, որ Ջերեմի Քորբինը հայտարարել է Միացյալ Թագավորության վարչապետ Բորիս Ջոնսոնի կառավարությանն անվստահության քվե հայտնելու և այն բանից հետո վաղաժամկետ խորհրդարանական ընտրություններ անցկացնելու պլանների մասին, երբ Բրյուսելի հետ համաձայնեցվի Brexit-ի նոր հետաձգումը: Քորբինը նաև հայտարարել է, որ լեյբորիստներն ապագա ընտրարշավի ընթացքում կքարոզեն Եվրամիությանն անդամակցության նպատակահարմարության հարցի շուրջը երկրորդ հանրաքվեի անցկացման օգտին:
