fbpx
ՏՏ

16:20 8/6/2019

Քննարկում Հակոբ Արշակյանի, Սպիտակ տան ու ԱՄՆ Կոնգրեսի անդամների միջև

ՀՀ բարձր տեխնոլոգիական արդյունաբերության նախարար Հակոբ Արշակյանը ԱՄՆ-ում մասնակցել է ԱՄՆ-ում ՀՀ արտակարգ և լիազոր դեսպան Վարուժան Ներսեսյանի ու Վաշինգտոնում տեղեկատվական տեխնոլոգիաների ու նորարարությունների ոլորտի առաջատար «Institute for Education» կազմակերպության գլխավոր գործադիր տնօրեն Քեթրին Քեմփերի կողմից կազմակերպված քննարկմանը:

Ներկա էին Սպիտակ տան ու ԱՄՆ Կոնգրեսի նորարարությունների խորհուրդների ղեկավար կազմն ու անդամները: Հանդիպման մասնակիցների թվում էին նաև ԱՄՆ տեղեկատվական տեխնոլոգիաների գլխավոր խորհրդականի տեղակալ Քորիանա Զարեկը, Սպիտակ տան նորարարությունների խորհրդի գործադիր տնօրեն Ջոշուա դի Ֆրանսեզը և Սպիտակ տան նորարարությունների խորհրդի ծրագրի նախագահ Կլարա Ցաոն:

Սպիտակ տան նորարարությունների ծրագրում ներկայում ընդգրկված են ԱՄՆ պետական ու մասնավոր ոլորտները ներկայացնող հաստատությունների ու խոշոր կորպորացիաների նորարարությունների ոլորտի առաջատար մասնագետներ, ովքեր ԱՄՆ նախագահի հովանու ներքո գործող այս ծրագրի շրջանակներում աշխատում են ոլորտի` երկրի համար առաջնային նշանակություն ունեցող խնդիրների լուծման ուղղությամբ:

Հանդիպման ընթացքում դեսպան Ներսեսյանը ներկայացրել է նորաստեղծ՝ Բարձր տեխնոլոգիական արդյունաբերության նախարարության գործառույթները, ինչպես նաև հակիրճ խոսել է նախարարի` Սիլիկոնյան հովիտ կատարած այցի մասին:

Նախարարը խոսել է բարձր տեխնոլոգիական ոլորտում Հայաստանի առաջընթացի, նախարարության ընթացիկ ծրագրերի ու նպատակների մասին, ներկայացրել Սիլիկոնյան հովիտ կատարած այցի ընթացքում տեղի ունեցած հանդիպումներն ու ձեռքբերված պայմանավորվածությունները, Հայաստանում ներդրումային հնարավորությունները:

Հակոբ Արշակյանը պատասխանել է ներկաների հարցերին, որոնք վերաբերում էին Հայաստանի գործարար միջավայրին, ոլորտի կրթական բարեփոխումներին, նորարարական լաբորատորիաների ստեղծմանը, կիբերանվտանգությանը և այլն: Զրուցակիցները մտքեր են փոխանակել վերոնշյալ ոլորտներում Հայաստան-ԱՄՆ հարաբերությունները խորացնելու շուրջ:

Նախարարը տեղեկացրել է նաև հոկտեմբերի 6-9-ը Հայաստանում կայանալիք Տեղեկատվական տեխնոլոգիաների համաշխարհային համաժողովի (WCIT-2019) մասին:

Այս մասին տեղեկանում ենք ՀՀ ԲՏԱՆ պաշտոնական կայքից։

Վերեվ