Կառավարության այսօրվա նիստը սկսվեց Իջևանի միջադեպի քննարկմամբ և շարունակվեց Սևանի հիմնախնդրով։ Վարչապետ Նիկոլ Փաշինյանը շրջակա միջավայրի նախարար Էրիկ Գրիգորյանին հարցրեց՝ ի վերջո մենք եկա՞նք եզրակացության, թե Սևանի հետ ինչ է կատարվում։
Նախարարը զեկուցեց, որ այսօր վիճակը բավական լավ է արդեն, ու ջրի թափանցիկության աստիճանը շատ ավելի բարձր է, քան նախորդ երկու տարիներին։ Ինչ վերաբերում է կապտականաչ ջրիմուռներին, Գրիգորյանն ասաց, որ դրանց արագ աճը կապված է եղել մի քանի գործոնների հետ՝ և՛ բնակլիմայական պայմանների, և՛ կեղտաջրերի հոսքի, և՛ ոչ պատշաճ մաքրված տարածքներից հոսքերի հետ։
Գրիգորյանը հայտարարեց, որ այդ նույն վիճակը եղել է նաև իրենց դիտարկման տակ եղած շատ ջրային ավազաններում՝ ամբողջ աշխարհում։
«Ամեն դեպքում էդ կեղտաջրերի նվազեցումը և ջրի մակարդակի բարձրացումը մեր առաջնային նպատակն է։ Եվ այս պահին լավ է վիճակը»,-ասաց Գրիգորյանը։
Նախարարի խոսքով՝ չնայած խնդիրների առկայությանը՝ Սևանի ջրի մակարդակը հիմա 2 սմ ավելի բարձր է, քան նախորդ տարի, ու այս տարի Արարատյան դաշտի ոռոգման համար ավելի քիչ ջուր է վերցվել լճից, քան նախորդ տարի։
