Խորհրդարանում լրագրողների հետ զրույցում ԱԺ նախագահ Ալեն Սիմոնյանը նշել է, որ Հայաստանի իշխանությունների համար Ադրբեջանում ապօրինաբար պահվող հայ ռազմագերիների վերադարձի հարցն ամենաառաջնայիններից է։
«Ռազմագերիներն ամբողջությամբ վաղուց պետք է վերադարձած լինեին: Ադրբեջանը փաստացի չի կատարում իր կողմից ստանձնած պարտավորությունները՝ տարբեր շինծու արդարացումներ բերելով»,- ասել է Սիմոնյանը:
Նրա խոսքով՝ երբ խոսում ենք ճանապարհների բացման, հարաբերությունների և խաղաղության մասին, պետք է մի բան մշտապես ասենք, որ այդ ճանապարհները բացելուց բացի այդ ճանապարհներով նախևառաջ պետք է մեր ռազմագերիները վերադառնան։
«Այսօր ես ունեմ հանդիպում նաև Կարմիր խաչի ներկայացուցիչների հետ, որտեղ այդ հարցը պետք է քննարկեմ իրենց հետ: Մեծ հույսեր և վստահություն ունեմ, որ մոտ ապագայում մենք ռազմագերի հասկացությունը, միգուցե, կթողնենք անցյալում»,- հավելել է ԱԺ նախագահը: