Սիվաս քաղաքում՝ Անկարա-Երզնկա մայրուղու վրա գտնվող «Սիվասսպոր» ակումբի մարզաբազայի մոտ, լուրջ ավտովթար է տեղի ունեցել։ Միջադեպի հետևանքով վնասվածքներ է ստացել 6 մարդ, որոնցից 4-ը՝ ակումբի U13 թիմի երիտասարդ ֆուտբոլիստներ։ Վթարը տեղի է ունեցել այն պահին, երբ ֆուտբոլիստներին տեղափոխող տաքսին փորձել է մուտք գործել ակումբի տարածք՝ «Իստանբուլսպորի» հետ նախատեսված խաղից առաջ իրենց պարտականությունները կատարելու համար։
Բախման հետևանքով մեքենաներից մեկը բռնկվել է, ինչի պատճառով դեպքի վայր են ժամանել հրշեջներ, ոստիկանություն և շտապօգնության աշխատակիցներ։ Տուժածները՝ Այազ Շենթյուրքը, Բուրակ Շահինը, Էբուբեքիր Աթըջըն և Ահմեդ Թալհա Յըլմազը, տեղափոխվել են քաղաքային հիվանդանոցներ։ Ակումբի պաշտոնական հայտարարության համաձայն՝ Բուրակ Շահինի վիճակը գնահատվում է ծանր, իսկ ակումբի բժշկական թիմը շարունակում է հետևել բոլոր տուժածների առողջական վիճակին։
«Սիվասսպորի» ղեկավարությունը հայտնել է, որ ակումբն անում է հնարավոր ամեն ինչ՝ աջակցելու իր երիտասարդ մարզիկներին և նրանց ընտանիքներին այս դժվարին պահին։ Տեղի ունեցածը ցնցել է ակումբին, որը ներկայումս իր ամբողջ ուշադրությունը կենտրոնացրել է տուժածների ապաքինման գործընթացի վրա։