Նոյեմբերի 28-ից 30-ը Մալթայում տեղի ունեցավ Սոցիալիստական ինտերնացիոնալի Խորհրդի նիստը, որը հյուրընկալել էր իշխող Partit Laburista կուսակցությունը։ Միջոցառմանը մասնակցում էին տարբեր երկրների վարչապետեր և բարձրաստիճան ներկայացուցիչներ, այդ թվում՝ Մալթայի վարչապետ Ռոբերտ Աբելան և Իսպանիայի վարչապետ Պեդրո Սանչեսը։ ՀՅԴ ներկայացուցիչ Մարիո Նալբանդյանը, որպես Սոցիալիստական ինտերնացիոնալի փոխնախագահ, մասնակցել է մի շարք նիստերի և պաշտոնական միջոցառումների։
Նիստի առանցքային թեման էր գլոբալ կայունության և խաղաղության խթանումը՝ միջազգային մարտահրավերների պայմաններում։ Նալբանդյանը իր ելույթում շեշտեց մարդու իրավունքների պաշտպանության կարևորությունը, անդրադառնալով նաև հայ ռազմագերիների հարցին և Լեռնային Ղարաբաղի իրավիճակին։ Նա ընդգծեց, որ միջազգային հանրությունը պետք է ակտիվորեն ներգրավվի այս խնդիրների լուծման գործում։
Նիստի ավարտին Սոցիալիստական ինտերնացիոնալը ընդունեց մի շարք բանաձևեր, այդ թվում՝ Լեռնային Ղարաբաղի վերաբերյալ։ Բանաձևում նշվում էր, որ խաղաղության հասնելու համար անհրաժեշտ է ապահովել տեղահանվածների վերադարձը, գերիների ազատ արձակումը և հայկական մշակութային ժառանգության պաշտպանությունը։ Կազմակերպությունը վերահաստատեց իր հանձնառությունը՝ աջակցելու արդարության և մարդու իրավունքների պահպանմանը։