ՀՀ ԱԺ «Իմ քայլը» խմբակցության անդամ Համազասպ Դանիելյանը օգոստոսի 1-ին հանդիպել է Սփյուռքի գործերի գլխավոր հանձնակատարի գրասենյակի կողմից իրականացվող Սփյուռքի երիտասարդ առաջնորդների համար կազմակերպված դասընթացի մասնակիցների հետ: Նրանք երկու շաբաթ գտնվելու են Հայաստանում՝ վերապատրաստելու իրենց գիտելիքներն ու հմտությունները, ինչպես նաև ծանոթանալու հայաստանյան օրակարգային հարցերին: Երիտասարդները ժամանել են Ռուսաստանից, Ուկրաինայից, Իրանից, Վրաստանից և Ֆրանսիայից:
Պատգամավորի հետ կայացած անմիջական զրույցի ընթացքում անդրադարձ է կատարվել մի շարք հարցերի, որոնք օրակարգային են թե՛ Հայաստանում բնակվող, թե՛ Սփյուռքի մեր հայրենակիցների համար:
Հյուրերը մասնավորապես հետաքրքրվել են ՀՀ Սահմանադրական դատարանի շուրջ ընթացող զարգացումներով, Թուրքիայի Ստամբուլ քաղաքում 2011 թվականին ստորագրված «Կանանց նկատմամբ բռնության և ընտանեկան բռնության կանխարգելման ու դրա դեմ պայքարի մասին Եվրոպայի խորհրդի կոնվենցիայի» խնդրահարույց դրույթներով, Հայաստան-Սփյուռք կապերով, Սփյուռքի համայնքներում հայոց լեզվի և հայ ինքնության պահպանության հարցերով, ՀՀ ընտրական համակարգով, մեր երկրում իրականացված Թավշյա հեղափոխությամբ և այլն:
Համազասպ Դանիելյանը պատասխանել է ներկաների հարցերին, ինչպես նաև առաջարկել հեռակա կարգով համագործակցել՝ երիտասարդներին հուզող հարցերի շուրջ:
Խոսելով Թավշյա հեղափոխության ձեռքբերումներից՝ պատգամավորն առանձնապես կարևորել է քաղաքացիների կորսված հավատի վերականգնումն ընտրական գործընթացների, մասնավորապես՝ ընտրության արդյունքների նկատմամբ: Նրա խոսքով՝ մարդիկ տեսել են, որ իրենց քայլերից և քվեից շատ բան է կախված:
Հանդիպման շրջանակում հյուրերը եղել են Ազգային ժողովի թանգարանում, ծանոթացել Հայաստանի խորհրդարանի պատմությանն ու նորանկախ Հայաստանի օրենսդիր մարմնի ղեկավարների ստացած հուշանվերներին, ինչպես նաև այցելել ԱԺ նիստերի դահլիճ, որտեղ ընդունվում են ՀՀ օրենքները:
