Թբիլիսիում բողոքի ակցիաները շարունակվում են: Այս պահին ծայրահեղ լարված է իրադրությունը խորհրդարանի շենքի մոտ: Վերջին իրադարձություններից հետո այսօր առաջին անգամ է գումարվում խորհրդարանի նիստը: Ընդդիմադիր առաջնորդների գլխավորությամբ ցուցարարները հավաքվել են խորհրդարանի մուտքի մոտ, պաստառներով և սուլոցներով բողոքում են ռուս պատգամավորներին ներս թողնելու դեմ: Ակցիայի մասնակիցները պահանջում են իշխանություններից ՆԳ նախարարի հրաժարականն ու ազատ արձակել հունիսի 20-ի ակցիայի ժամանակ ձերբակալվածներին:
Թբիլիսիի ցուցարարներին, ամենայն հավանականությամբ, կմիանան Վրաստանի այլ քաղաքներում անցկացվող ակցիաների մասնակիցները: Արդեն մի խումբ ցուցարարներ Բաթումիից մայրաքաղաք են հասել:
Վրաններ Բիձինա Իվանիշվիլիի առանձնատան մոտ: Ցուցարաները նաև բողոքի այստարբերակով են որոշել առաջ գնալ:
Խորհրդարանի դիմացի բեմահարթակում տեղադրված է Վրաստանի ներքին գործերի նախարար Գիորգի Գախարիայի կիսանդրին՝ աչքին վիրակապ: Սա, որպես հիշեցում ,որ բախումների հետևանքով երկու մարդ կորցրել էր աչքը:
Իշխանությունները մասամբ կատարել են ակցիայի մասնակիցների պահանջը՝ պաշտոնանկ են արել խորհրդարանի խոսնակին:Կատարել են նաև խորհրդարանական ընտրությունների համամասնական ընտրակարգին վերադառնալու պահանջը: Ցույցի ընթացքում հատուկ միջոցներ կիրառած որոշ իրավապահների լիազորություններ դադարեցվել են, երկուսի նկատմամբ քրեական գործ է հարուցվել:
ՆԳ նախարարի հրաժարականի հարցում, սակայն, իշխանությունները չեն շտապում: