Քաղաքականություն

Վազգեն Մանուկյանի համերաշխության կոչը, թե՞ խժդժությունների նոր ալիք

Ընդդիմադիր 16 կուսակցություններից կազմված «Հայրենիքի փրկության շարժում» նախաձեռնության վարչապետի միասնական թեկնածու Վազգեն Մանուկյանը հանրային համերաշխության կոչով է հանդես եկել։ Նա նշել է, որ երկրում ցնցումներ հարկավոր չեն:

«Հարգելի՛ հայրենակիցներ

Մեր շարժումը թափ է հավաքում։ Ամեն օր մեզ անհատներ, նոր խմբեր ու կառույցներ են միանում։ Հազարավոր լուսավոր երիտասարդներ և մեր երկրի ապագայով մտահոգված մարդիկ Երևանում ու բոլոր մարզերում արժանապատվորեն պայքարում են մեր անվտանգության, մեր արժանապատվության ու վաղվա օրվա համար։
Սա նեղ կուսակցական շարժում չէ։ Սա միայն իշխանափոխության շարժում չէ։ Սա նախևառաջ արժանապատվության շարժում է։ Պարտության խարանը մեր վրայից մաքրելու, մեջքներս ուղղելու և ապագան կերտելու շարժում։
Թե ինչու պետք է հեռանա այս վարչախումբն իր պարագլխի հետ, լրացուցիչ բացատրության կարիք չունի, քանզի խայտառակ կապիտուլյացիայից հետո այլ բան չի կարող լինել։
Մենք ժողովրդի աջակցությամբ կձևավորենք ազգային համաձայնության նոր կառավարություն, կլծվենք հրատապ խնդիրների լուծման գործին, կնախապատրաստենք նոր ընտրություններ։
Կարևորում եմ գործող Ազգային ժողովի կայունացնող դերակատարումը ստեղծված քաղաքական ճգնաժամում։ Մենք չենք ուզում ցնցումներ։ Մեզ հանրային համերաշխություն է պետք։ Ատելության ու թույնի մթնոլորտը պետք է մնան անցյալում։
Իրավապահ մարմիններին կոչ եմ անում պահպանել հասարակական կարգը, չդառնալ քաղաքական գործիք պարտված իշխանության ձեռքում։
Եկեք տեր կանգնենք մեր ապագային, եկեք միասին մասնակցենք մեր երկրի վերածննդին։»,- ասված է ուղերձում:

Խորհրդարանական և արտախորհրդարանական ընդդիմադիր կուսակցություններ նոյեմբերի 11-ից տարբեր ակցիաներ են իրականացնում` պահանջելով ՀՀ վարչապետ Նիկոլ Փաշինյանի հրաժարականը:

Հիշեցնենք, որ Ազատության հրապարակում հավաքի ժամանակ Վ. Մանուկյանն իր ելույթում սպառնացել էր գործող իշխանություններին, որ եթե հրաժարական չտան, ապա գազազած ժողովուրդը կհոշոտի իրենց, ինչը զայրույթ էր առաջացրել լայն հանրության շրջանակներում։ 16 կուսակցությունները նաև ժամկետ էին նշել՝ մինչև դեկտեմբերի 8-ը, ժամը 12:00, սակայն իշխանությունը չարձագանքեց նրանց պահանջին։

 

ՎԵՐՋԻՆ ԼՈւՐԵՐ

ՎԵՐԵՎ