ՀՀ ԱԺ նախագահի տեղակալ Լենա Նազարյանն ու ԱԺ արտաքին հարաբերությունների մշտական հանձնաժողովի նախագահ Ռուբեն Ռուբինյանն ապրիլի 25-ին ընդունել են Կամբոջայի Թագավորության պատվիրակությանը՝ արտաքին գործերի և միջազգային համագործակցության նախարարության պետքարտուղար Աուչ Բորիթի գլխավորությամբ:
Լենա Նազարյանը, նշելով, որ հայ ժողովուրդը տոնում է թավշյա հեղափոխության մեկամյակը, ներկայացրել է 2018 թ. դեկտեմբերի 9-ին կայացած ժողովրդավարական ընտրությունների միջոցով ձևավորված նոր խորհրդարանի առաջնահերթությունները:
ԱԺ փոխնախագահը կարևորել է 2018 թվականին Հայաստանում անցկացված Ֆրանկոֆոնիայի միջազգային կազմակերպության 17-րդ գագաթաժողովին Կամբոջայի Թագավորության փոխվարչապետի մասնակցությունը:
Ընդգծելով պատգամավորական բարեկամական խմբերի դերը երկկողմ հարաբերություններում՝ Լենա Նազարյանը նշել է, որ ՀՀ օրենսդիր մարմնում դեռևս ստեղծված չէ Հայաստան-Կամբոջա բարեկամական խումբը և կարևորել դրա ձևավորումը: Նա բարձր է գնահատել միջազգային հարթակներում երկկողմ հետաքրքրություն ներկայացնող հարցերի շուրջ առկա համագործակցությունը:
Ռուբեն Ռուբինյանը երախտագիտություն է հայտնել Կամբոջայի պատվիրակությանը Հայոց ցեղասպանության հուշահամալիր այցելելու համար: Նա համոզմունք է հայտնել, որ աշխարհագրական հեռավորությունը չի կարող խոչընդոտել երկկողմ կապերի հաստատմանը՝ ընդգծելով, որ ՀՀ օրենսդիր և գործադիր մարմինները պատրաստակամ են այդ հարցում:
Կողմերը կարևորել են երկու երկրների միջև հարաբերությունների հաստատումն ու զարգացումը, փոխայցերը, խոսել տարբեր բնագավառներում, մասնավորապես զբոսաշրջության, տեղեկատվական տեխնոլոգիաների, տնտեսական ոլորտներում փոխգործակցության հնարավորությունների մասին:
