fbpx
Զինված Ուժեր
01:00 15/02/2020

ԶՈՒ-ում կատարվող դեպքերը սկսել են բացառությունից վերածվել վտանգավոր օրինաչափության․ «Ժառանգություն»

Հայաստանի Հանրապետության և Արցախի անվտանգության երաշխավոր, մեր ապավենն ու հպարտությունը դարձած բանակից վերջին մեկ ու կես ամսում արդեն մեկ տասնյակից ավելի երիտասարդների մահվան գույժն անընդունելի իրողություն է, որի հետ ոչ մի կերպ չենք կարողանում հաշտվել: Այս մասին հայտարարություն է տարածել «Ժառանգություն» կուսակցությունը:

Հայտարարությունում նաև ասվում է.

«Ժառանգություն» կուսակցությունը ցավ ի սիրտ արձանագրում է, որ մեր զինված ուժերում կատարվող նման դեպքերն արդեն սկսել են բացառությունից վերածվել վտանգավոր օրինաչափության: Թվացյալ հրադադարի պայմաններում մեր բանակում առայժմ պաշտոնապես չբացահայտված կասկածելի պատճառներով տեղի ունեցած մահվան դեպքերը դառնում են մեր պետականությանը նետված լրջագույն մարտահրավեր՝ խոցելի դարձնելով Հայաստանի ու Արցախի մարտունակությունն ու պաշտպանությունը:

Մեր խորին ցավակցությունն ու աջակցումն ենք հայտնում զոհված զինվորների մերձավորներին և հարազատներին: Միաժամանակ մեր քաղաքացիական և կուսակցական պարտք ենք համարում պահանջել Հայաստանի պատկան և իրավասու մարմիններից հրատապ միջոցառումներ ձեռնարկել իրավիճակի հանգուցալուծման, «չպարզված հանգամանքների» հրապարակային բացահայտման համար:

Եթե այս ամենի հիմքում, ոչ կանոնադրական հարաբերությունները և «գողական ենթամշակույթն» է ընկած, ապա բանակը և իրավապահ մարմինները ՀՀ պաշտպանության նախարարի և Արցախի ՊԲ հրամանատարի անվերապահ հսկողությամբ պետք է արմատախիլ անեն այդօրինակ ցանկացած դրսևորում:

«Ժառանգությունը» համոզված է, որ Հայաստանում ոչ ոք չի կարող մնալ պարզ արձանագրողի դերում, պետության պատժիչ համակարգի, քաղաքական ու իրավական կամքի առջև ոչ մի ենթամշակույթ չի կարող գործել իր ավերածությունները: Բանակում կատարվող յուրաքանչյուր իրավախախտում, ոչ կանոնադրային հարաբերությունների հաստատման որևէ փորձ այսուհետ անուշադրության ու կոծկման չպետք է ենթարկվեն: Հայաստանի համար անգնահատելի արժեք է հայ զինվորի առողջությունն ու կյանքի իրավունքը:

«Այլևս երբեք»-ի հաստատակամությամբ՝ խոնարհվում ենք մեր զոհված զինվորների առաջ»:

ՎԵՐՋԻՆ ԼՈւՐԵՐ

Վերեվ