Գրենլանդիայում տնտեսական ակտիվությունը նկատելիորեն դանդաղել է ԱՄՆ նախագահ Դոնալդ Թրամփի երկրորդ ժամկետի սկսվելուց հետո։ Գրենլանդիայի Ձեռնարկությունների ասոցիացիայի գլխավոր քարտուղար Դան Սիվերտսենը նշել է, որ ներկայիս աշխարհաքաղաքական միջավայրում ներդրումների նկատմամբ աճում է դժկամությունը, հատկապես զբոսաշրջության և շինարարության ոլորտներում։ Նա ընդգծել է, որ Թրամփի հայտարարությունները, որոնք վերաբերում են Գրենլանդիայի հնարավոր բռնակցմանը, ազդել են տնտեսության վրա։
Թրամփը բազմիցս հայտարարել է, որ Գրենլանդիան պետք է միանա Միացյալ Նահանգներին, ինչը առաջացրել է անհանգստություն Դանիայի կառավարության և Գրենլանդիայի բնակիչների շրջանում։ Բանն այն է, որ 1951թ․ Վաշինգտոնը եւ Կոպենհագենը, ՆԱՏՕ դաշինքի իրենց պարտավորություններից բացի, ստորագրել են Գրենլանդիայի պաշտպանության պայմանագիրը: Դրա համաձայն՝ Միացյալ Նահանգները պարտավորություն է ստանձնել պաշտպանել դանիային պատկանող կղզին հնարավոր ագրեսիայից: