Լեհաստանի հարավարևմտյան Կլոձկո շրջանում մեկ մարդ է խեղդվել և 1600-ը տարհանվել են, քանի որ գետերում ջրի մակարդակը հասել է ռեկորդային բարձրության մակարդակի՝ օրեր շարունակվող հորդառատ անձրևներից հետո մի քանի մունիցիպալիտետներում ջրհեղեղներ առաջացնելով, հայտնում է Reuters-ը։
«Իրավիճակը շատ դրամատիկ է, առավելապես Կլոձկո շրջանում», – կիրակի օրը լրագրողներին է հայտնել վարչապետ Դոնալդ Տուսկը Կլոձկո քաղաքի ճգնաժամային կառավարման թիմի հետ հանդիպումից հետո:
Տարածաշրջանի շուրջ 17000 տնային տնտեսություններ մնացել են առանց էլեկտրականության, իսկ որոշ շրջաններում անհասանելի է եղել բջջային կապը: Ըստ Տուսկի, Լադեկ-Զդրոյ և Ստրոնե-Սլասկիե քաղաքների ճանապարհները գործնականում արգելափակված են։
25․000 բնակիչ ունեցող Կլոձկոն մասամբ ջրի տակ է հայտնվել, քանի որ տեղական գետի ջրի մակարդակը բարձրացել է 665 սմ-ով, ինչը շատ ավելի բարձր էր տագնապալի 240 սմ մակարդակից և ռեկորդից, որը սահմանվել էր 1997-ի սաստիկ ջրհեղեղի ժամանակ, ինչը մասնակիորեն վնասել էր քաղաքը և 56 մարդու մահվան պատճառ դարձավ Լեհաստանում։
«Կոչ եմ անում բնակիչներին համագործակցել փրկարար ծառայությունների հետ, երբ տարհանման ազդանշաններ են ստացվում», – ասել է Տուսկը։
Պատմական Գլուխոլազի քաղաքում, որը գտնվում է հարևան Օպոլե շրջանում, քաղաքապետը կիրակի առավոտյան հարկադիր տարհանման կարգադրություն է տվել, քանի որ տեղի գետը սկսել է դուրս գալ ափերից: Հրշեջները, տեղական իշխանությունները և զինվորները շաբաթ օրվանից աշխատում են պաշտպանել քաղաքի կամուրջը՝ դրա վրա ծանր քարեր դնելով՝ այն ավելի հաստատուն դարձնելու համար: Հանգստյան օրերի սկզբից հրշեջներն աշխատում են Լեհաստանի հարավարևմուտքում՝ օգնելու հաղթահարել ջրհեղեղը: Կիրակի և երկուշաբթի օրերին սպասվում են տեղումներ, ինչը էլ ավելի կվատթարացնի իրավիճակը։
ԽՈՐՀՈւՐԴ Է ՏՐՎՈւՄ ԿԱՐԴԱԼ
