Ջունգարի Ալաթաուի լեռներում մեկնարկել են «Ալթին Կիրան-2024» («Ոսկե արծիվ-2024») մարտավարական և հատուկ զորավարժությունները՝ Ադրբեջանի և Ղազախստանի զինվորականների մասնակցությամբ։
Ինչպես հայտնել է Ադրբեջանի ՊՆ-ն, պլանի համաձայն, մասնակից երկրների զինվորականները հետախուզական առաջադրանքներ են իրականացրել լեռնային տեղանքում, դժվարանցանելի հատվածով։
Զորավարժությունների առաջին օրը մասնակիցներին տրվել են մագլցման տեխնիկայի կիրառման, զառիթափ ժայռերից վերելքի և վայրէջքի, բարձրության վրա առաջին բուժօգնության և վիրավորների տարհանման դասընթացներ:
Զորավարժությունների ընթացքում հիմնական ուշադրությունը դարձվել է մարտական առաջադրանք կատարելիս անձնակազմի մարտավարական հմտությունների կատարելագործմանը և ստորաբաժանումների մարտունակության հետագա բարձրացմանը։