Հայաստանը շարունակում է մնալ Հավաքական անվտանգության պայմանագրի կազմակերպության (ՀԱՊԿ) դաշնակիցը, և դուռը բաց է հանրապետության լիարժեք մասնակցության համար։ Այս մասին ՏԱՍՍ-ին տված հարցազրույցում հայտարարել է ՀԱՊԿ գլխավոր քարտուղար Իմանգալի Տասմագամբետովը։ Նա ընդգծել է, որ Հայաստանի ժողովուրդը շահագրգռված է Եվրասիայում ընդհանուր անվտանգության տարածք ստեղծելու հարցում։
ՀԱՊԿ գլխավոր քարտուղարը նշել է, որ ՀՀ-ն սառեցրել է իր աշխատանքը կազմակերպությունում, ինչը արտացոլում է Հայաստանի քաղաքական ղեկավարության ներկայիս դիրքորոշումը։ Նա հավելել է, որ սա անկախ և ինքնիշխան պետության որոշում է, որի վրա ոչ մի այլ պետություն կամ կազմակերպություն չի կարող ազդել։ Սակայն, միաժամանակ ընդգծել է, որ նոյեմբերին Հայաստանի արտաքին գործերի նախարարությունը հայտարարել էր, որ ՀԱՊԿ-ից դուրս գալու հարցը սեղանին դրված չէ։
ՀԱՊԿ-ի գլխավոր քարտուղարը հույս է հայտնել, որ Հայաստանը մոտ ապագայում կվերադառնա կազմակերպությանը լիարժեք մասնակցությամբ՝ ընդգծելով, որ դրա համար բոլոր պայմաններն ու նախադրյալները գոյություն ունեն։