Հայաստանի վարչապետ Նիկոլ Փաշինյանը Լեհաստանում կայացած հանդիպման ժամանակ անդրադարձել է երկրի սահմանային անցակետերի վերահսկողության հարցին՝ նշելով, որ մինչև 2024 թվականը սահմանային անցակետերի մեծ մասը գտնվում էր Ռուսաստանի հսկողության ներքո կամ այնտեղ կար ռուս սահմանապահների ներկայություն։ Օրինակ՝ Երևանի «Զվարթնոց» միջազգային օդանավակայանում ռուս սահմանապահները դուրս են եկել 2024-ի օգոստոսի 1-ից։ Փաշինյանը ընդգծել է, որ ներկայում Հայաստանի բոլոր սահմանային անցակետերը վերահսկվում են ՀՀ սահմանապահների կողմից, ինչը վկայում է երկրի անվտանգության ոլորտում ունեցած առաջընթացի մասին։
Վարչապետը նաև նշել է, որ Հայաստանը սերտ գործընկեր է Ռուսաստանի հետ և չունի որևէ պլան կամ մտահոգություն կապված ռուսական ռազմաբազայի ներկայության հետ։ Նա շնորհակալություն է հայտնել Ռուսաստանին 90-ականների սկզբին սահմանների պահպանության ոլորտում ցուցաբերած աջակցության համար, երբ Հայաստանը նորանկախ պետություն էր և չուներ անհրաժեշտ կարողություններ։ Սակայն այժմ Հայաստանը զարգացնում է իր սահմանապահ ծառայությունները և կարող է ինքնուրույն ապահովել սահմանների անվտանգությունը։