Գերմանիայում էլեկտրաշարժիչների անցում կատարելու արդյունքում 2030 թվականին կփակվի շուրջ 125 հազար աշխատատեղ: Այս մասին հաղորդում է գերմանական Deutsche Welle-ն:
Նշվում է, որ Center Automotive Research (CAR) ինստիտուտի վերլուծական նյութից պարզ է դառնում, որ աշխատատեղերի մեծամասնությունը, որոնց կարիքը հետագայում չի լինի, կապված է արտադրության հետ: Այդպիսի կրճատման նախադրյալը այն է, որ «սովորական» ավտոմեքենաների բազում բաղադրիչների, ինչպիսիք են մեխանիկական փոխանցման տուփերը և ներքին այրման շարժիչի այլ բաղկացուցիչ մասերը, այլևս անհրաժեշտ չեն լինի: Այդ իսկ պատճառով շահագործման մեջ էլեկտրամոբիլները համարվում են ավելի տնտեսող:
CAR ինստիտուտի փորձագետները ենթադրում են, որ շուրջ տասը տարուց Գերմանիայում էլեկտրամոբիլները կկազմեն այդ երկրում արտադրված բոլոր մեքենաների շուրջ երկու երրորդը: Դրանց արտադրության համար այդ ժամանակ, հավանաբար, անհրաժեշտ կլինի 709 հազար մարդ 834 հազարի փոխարեն: Դա հաշվի առնելով՝ Գերմանիայի ֆինանսների նախարարությունում աշխատում են արդյունաբերական վերակազմավորմանն աջակցելու նախագծերի շուրջ: