Ազգային ժողովում այսօրվա իր ելույթի ժամանակ «Իմ քայլը» խմբակցության անդամ Բաբկեն Թունյանը, անդրադառնալով էդմոն Մարուքյանի այն խոսքին, թե խորհրդարանում շահերի բախում կա և խոստանում է աննուններ բացահայտել, ասաց.
«Հույսս մնաց պարոն Մարուքյանը, որ անձնական շահերը բացահայտի, կխնդրեմ՝ իմ շահերն էլ բացահայտի»:
Խոսելով որակի մասին՝ պատգամավորը ասաց, որ դա ամենակարևոր կետերից է, ապա նշեց՝ այսօր խնդիր կա, որ թե´ ներկրվող, թե´ արտադրվող ցեմենտի որակը հստակ ստուգվի. շինարարները մի բան են ասում, արտադրողները՝ մեկ այլ:
Անդրադառնալով ԲՀԿ պատգամավոր Արման Աբովյանին այն խոսքին, որ պետք է տեղական արտադրողը խրախուսվի, ասաց.
«Դուք ի՞նչ հեռախոս ունեք, արտասահմանյա՞ն, թե՞ տեղական: Որ ասում եք՝ տեղական արտադրողը միանշանակ պետք է խրախուսվի, ճիշտ է, բացի «միանշանակ»-ից, որովհետև այդ դեպքում Դուք պետք է «Արմֆոն» բռնեիք: Ես ձեզ համար կճարեմ»:
Նա նշեց՝ եթե տեղական արտադրանքը թեկուզ հարաբերական մրցունակություն ունի, այդ բոլոր հարցերը մանրամասն պետք է քննարկել: Պատգամավորը նաև բարեկամական խորհուրդ տվեց «Բարգավաճ Հայաստան»-ի իր գործընկերներին:
«Որ ասում եք՝ պարոն Ծառուկյանը 50 հազարը իջեցրեց 40 հազարի, դուք անուղղակիորեն նրա կարգավիճակը փոխում եք գործարարի, իսկ գործարարը չի կարող պատգամավորական գործունեությամբ զբաղվել: Խնդրո´ւմ եմ, տենց վատություն մի´ արեք պարոն Ծառուկյանին: Այս ամենի միակ էֆեկտը եղավ, որ բոլորս հասկացանք՝ կլինկերը ինչ է, ես, օրինակ, գիտեի՝ ՀՆԱ-ի դեֆլյատորն ինչ է»,- ասաց նա:
Բաբկեն Թունյանը նաև հավելեց, որ իրենց բոլորի նպատակը նույնն է, դրան հասնելու առաջարկված ճանապարհներն են տարբեր:
«Պարո´ն Մարուքյան, Դուք, որ ներկայացրիք այս ամենը, երեք կողմերի բաժանեցիք՝ կառավարություն-ԱԺ, «Իմ քայլը», «Բարգավաճ Հայաստան», դուրս եկավ, որ բոլորս չգիտեմ ինչով ենք զբաղված, միակ ճիշտ ճանապարհը Դուք գիտեք: Ստացվում է՝ ճիշտ ճանապարհը գիտեք, կխնդրեմ՝ մի տարբերակ բերեք, քննարկենք: Մենք կփորձենք մեր ուժերով այդ ճանապարհը գտնել: Չի կարելի զուտ դեմ լինելու համար դեմ լինել: Ասում ենք՝ այս պահին սա է պետք, որ ոչ մեկը չտուժի, եթե գտնում եք, որ դեմ քվեարկելով ավելի օգուտ է լինելու, դեմ քվեարկեք, ձեր խնդիրն է»,- ասաց նա:
ԽՈՐՀՈւՐԴ Է ՏՐՎՈւՄ ԿԱՐԴԱԼ
