Պաշտպանության նախարարությունը, Factor.am-ի գրավոր հարցմանն ի պատասխան, հաստատել է, որ Վրթանես եպիսկոպոս Աբրահամյանին 2018 թվականի սկզբին հատկացվել է երկուսենյականոց բնակարան՝ անհատույց օգտագործման իրավունքով։ Այս որոշումը կայացվել է պաշտպանության նախարար Վիգեն Սարգսյանի հրամանով։ Նշվում է, որ այլ հոգևորականներ բնակարաններ չեն ստացել, իսկ բնակարանի շուկայական արժեքի վերաբերյալ տեղեկատվություն չի տրամադրվել։
Վրթանես եպիսկոպոս Աբրահամյանը, ով ներկայումս Արցախի թեմի առաջնորդն է, նախկինում զբաղեցրել է ՀՀ Զինված ուժերի հոգևոր առաջնորդի պաշտոնը։ Նա 2008 թվականին ստացել է եպիսկոպոսական ձեռնադրություն և օծում Գարեգին Բ Ամենայն Հայոց Կաթողիկոսի կողմից։ Վերջին շրջանում մամուլում շրջանառվում են տեղեկություններ, որ նրան սպառնացել են զրկել բնակարանից, եթե չմիանա վարչապետ Նիկոլ Փաշինյանի՝ եկեղեցին բարենորոգելու ծրագրին։
Նշենք, որ դեկտեմբերի 16-ից ստորագրահավաք է անցկացվում՝ Վրթանես եպիսկոպոս Աբրահամյանին Արցախի թեմի առաջնորդի պարտականություններից ազատելու պահանջով։